Vawiin khan S.A.I Extension Centre, Electric Veng, Lunglei-ah HPC Sport Incentive Cash Awards 2013-2014 a semna neih a ni a, Lunglei West bialtu MLA Pu Chalrosanga Ralte chuan heng cash award-te hi a sem a ni.

HPC Sport Incentive Cash Awards Commitee Chairman Pu R.Lalrosanga inkhawm kaihhruaiah Pu Chalrosanga Ralte MLA chuan Sport Incentive Cash Awards dawngtu zawng zawngte a lawmpuina thu sawiin Award an dawn theihna chu an taimakna leh tumruhna rah a ni a ti a; hun lo kal zel turah pawh ram leh hnam tana pasaltha ni turin duhsakna a hlan bawk. Sorkarin infiamna lamah chak taka hma a lakna avangin ruahmanna tha leh fel zawk kan nei mek zel a, heng hi mimal ta ni lovin Zofate ta a ni a, mahni anga enin hmang tangkai tur a ni a, player naupang lamte chherchhuah lamah pawh tan kan lak a ngai a ni, a ti bawk. Infiammite chu ruihtheih thil leh zuk leh hmuam a inthiar fihlim tur leh insum theihna neih turin a chah a, naupangte phei chu infiamnaah chauh ni lovin an zirlaiah pawh theihtawp chhuaha hlawhtlinna hmuh ngei turin a fuih bawk. Lunglei District chhunga Sports hrang hranga hruaitu ten theihtawp an chhuah thin chu a lawmawm hle a tih thu leh he Award sem theihna tura hmalatu Lunglei High Powered Committee chungah pawh lawmthu a sawi bawk a ni.

Vawiina Cash Award semnaah Pu J.Vansanglura,Secretary HPC Sport Incentive Cash Awards Committee report-a a tarlan danah tun tum hi HPC Sport Incentive Cash Awards an sem vawi 3-na a ni a. Tun tumah hian Cheng Nuai 1 sem a ni a, infiammi 134 leh Coach 1 (an zavaiin mi 135) hnenah sem a ni a. International Level-ah Gold 2 leh Bronze1 late hnenah sem a ni a; National Level-ah Gold 6, Silver 3 leh Bronze 7 sem a ni bawk. State level-ah Gold 74, Silver 20 leh Bronze 8 bakah District Level-ah hian Gold Medal hmu infiammi 13 hnenah Sports Incentive Cash Award hi pek an ni bawk.