Nimin tlai khan Lunglei HPC Vice Chairman Pu Lawmawma Tochhawng chuan a office chamber-ah Lungleia Department hrang hrang hotute ko khawmin tun hnaia  ruahsur leh thli tleh avanga Lunglei District hmun hrang hranga chhiatna thlengte leh kan chunga thleng thei reng chhiatrupna lo hmachhawn tura inpuahchahna te chipchiar takin a sawipui.

Pu Lawmawma Tochhawng chuan tun hnai fur ruahsur leh thli tleh nasa lutuk avangin Mizoram hmun hrang hrangah chhiatna a thleng mek chu pawi a tih thu tarlangin tanpui ngaite leh chhanchhuah ngaite pui turin sawrkarin nasa takin hma a la mek zel a ni, a ti. Chhiat tawk chhungkuate a tawrhpui takzet thu sawiin sawrkar, tlawmngai pawl leh khawtlang hruaitute tangkawpin chhanchhuah leh chhawmdawl hna tha taka an kalpui avangin an chungah lawmthu a sawi. Mipuite innghahna an ni tih hre reng chunga thawhhona tha tak nen chhawmdawl hna chak taka lo kalpui zel turin officer kalkhawmte chu a chah a ni.

Department hrang hrang aiawhten anmahni zawn theuha an hmalaknate report pein tui supply, kawng dinhmun, ei leh bar, diesel leh petrol,dan leh thupek kenkawh, silpaulin dinhmun te an sawiho a ni. Lunglei DCSO Pi Caroline Lalbiaktluangi Khiangte chuan fur ruahtui avanga thingtlang hmun kilkhawr tak tak te buhfai nghei lova an awmna tura FCS&CA Department ruahmanna ‘Monsoon Stock’ chu Lunglei District huamchhunga Supply Centre 15-ah semchhuah hman vek a nih thu tarlangin ei leh barah harsatna awmlo tura an in beisei thu a sawi. Lunglei SDO (S) Pu Lalnundika chuan silpaulin stock an chah belh thu a tarlang bawk. PWD hotuten Lunglei leh Tlabung inkar leimin nasa tak thianfai turin JCB pahnih (2) a duty mek thu leh harsatna dang a awmloh chuan tun karah kawng a tlang hman an beisei thu an tarlang. Lunglei to Aizawl leh Lunglei to Lawngtlai leh Lunglei to Hnahthial kawng a leimin te thenfai tawh niin tun dinhmunah a tlang tawh tih an report bawk. Tin, leimin thenfai hna hi kalpui mek niin hemi ina a nghawng tel power line siamthat pawh theih anga kalpui zel a ni a, current pawh tha chho zel tura beisei a ni.

Lunglei District huamchhungah chhiatna engemawzat thleng mek in Khawthlang Tuipui lian avangin chhungkaw 700 (mi 3512) velin an chenna in an chhuahsan tawh a, heng te hi Relief Camp 12 ah sem darh an ni. Hnahthial ah chhungkaw panga (5) in thiar chhuak tawh in College Veng Lungleiah in pasarih (7) atangin chhungkaw sawm pahnih (12) an in thiar chhuak tawh bawk a ni. Hemi bakah hian Zotlang, Zohnuai, Zobawk, Luangmual khaw chhung hmun danga leiminte leh kawngpui hmun hrang hrangah leimin a awm bawk a ni.

Lunglei HPC Vice Chairman hova Committee chuan chhiat tawkte tanpui tura mipui, tlawmngai pawl te, khawtlang hruaitute leh Department hnathawkte inpekna leh tlawmngaihna chu ropui an tih thu sawiin an chungah lawmthu an sawi a. Mipui te hrilhhriat kawnga nasa taka tan la tu media-te chungah lawmthu an sawi bawk a ni.  Mipui te chiai lo tur leh mitinte fimkhur lehzual turin Committee chuan Lunglei District mipuite a ngen a. Tin, chhiatna a thlenin mipui tam tak a hmunah an pungkhawm thin a, hei hian chhanchhuah hna kalpui kawngah harsatna tam tak a thlen fo avangin official-te thu ngaichang thiam turin Committee chuan mipuite a ngen bawk a ni.

Lunglei District Disaster Management Authority chu a tulna apianga che chhuak turin an inralring reng a. Official - te insemdarhin thli leh ruah avanga Lunglei hmun hrang hranga leimin, mimal leh vantlang thil tihchhiat te hi a hmunah kalin an enfiah zel a. Hemi bakah hian 2nd Battalion MAP hnuaiah SDRF trained personnel 100 awmin Sipai engemawzat an che chhuak mek a ni.

Tin, Lunglei District Emergency Operation Centre pawh hawn leh tawh niin a tul hun apiangah 0372-2325949, 9774294825 (Pu Lalthakima Chhangte SDC i/c DMR) leh 9862653478 (Pi Chuaupari Pachuau DO, DMR) ah te engtik lai pawhin an phone theih a ni.