Vawiin khan DC Conference Hall, Mamit-ah District Sanitation Task Force chu Dr. Lalrozama, IAS, Mamit District Bawrhsap, Sanitation Task Force Chairman ni bawk hoin thutkhawm a ni.

Meeting-ah hian Chairman chuan faina pawimawhzia sawiin faina chu mawina ringawt ni lovin hriselna nena kal kawp tlat a ni a. Natna tam tak hi kan in leh a vel fai tawk loh avanga awm thin anih avangin nasa lehzuala faina kawnga tan kan lak a pawimawh a ni a ti.

Vawiin Meeting-ah hian puipunna (public place) hmunah bawlhhlawh bawm a remchan dan anga dah turin rel a ni a. Mamit Dumping Ground dinhmunte endik nise tih anih bakah khawpui chhunga VC zawng zawngte chu an VC Area theuh tihfai hnatlang a rualin neih nise tih a ni a, an bawlhhlawh ruhkhawm paihna turin UD&PA Deptt lamin Motor ngaihtuahsak nise tih a ni bawk.

Meeting-ah hian NGO hruaitute, Kohhran hruaitute leh khawtlang hruaitute chu an kalna hmun leh an thusawina hmun apiangah faina chungchang uar taka sawi tel tura ngen nise tih a ni a. Khawpui chhung hmun remchang lai apiangah a remchan dan anga faina chungchang thuziak tar nise tih a ni bawk.

Vawiin Meeting-a thurelte bawhzui tur hian DUDO Mamit kaihhruaina hnuaiah Sub-Committee din nghal a ni a. Meeting-ah hian District Sanitation Task Force Member-te an tel tha hle a ni.