Vawiin khan HPC Vice Chairman Pu S.Laldingliana hovin ama office chamber-ah Lunglei Ngasih Minor Irrigitaion Project kalpui dan tur zirtura Mizoram sorkarin a ruai Japan International Cooperation Agency (JICA) mithiamte leh Minor Irrigation Dept. officials te chu thukhawmin, Nghasih-a Minor Irrigation Project atana hmalak zeldan tur an sawiho a ni. JICA aiawhte hi Pu Shigeki Yamaoka, Rural Development Planning-in a rawn ho a, sorkar lam aiawhin Minor Irrigation CE Pu Lalthangliana leh department officials dangte an tel thung a ni. HPC Vice-Chairman Pu S.Laldingliana hovin Japan mithiamte leh Minor Irrigation Department officials te chuan tukin zingkar khan Lunglei Nghasih-a Minor Irrigation Project chu a hmunah an enfiah hmasa tawh a. A hnua HPC Office-a meeting an neihah JICA mithiamten thil an hmuhdante tarlangin, he Project atan hmalak an tumdan te chu Vice-Chairman an sawipui bawk a ni.

HPC Vice-Chairman Pu S.Laldingliana chuan Minor Irrigation tihhmasawn nan Beneficiaries ten theihtawp an chhuah laiin hmasawnna dang neihbelh theih dan ngaihtuah turin Mizoram sorkar an ngen angin Chief Minister Pu Lal Thanhawla chuan Japan mithiamte chawluta hetianga hmalak hi thaa hriain tun dinhmun hi kan thleng ta a ni, a ti a. Japan mithiamte hian Agriculture lama hmasawnna siam tumin Mizoram leilung an rawn rap ta hi a lawmawmin kan hlawkpui ngei pawh a beiseiawm a ni, a ti.

JICA Team hotupa Shigeki Yamaoka, Rural Development Planning chuan Mizoram-ah Minor Irrigation lama hmasawnna a awm theih nan anmahni sum senga rawn lut an nih thu a sawi a. September ni 7, 2013 khan Mizoram sorkar nen hemi chungchanga hmalakna kawnga inremna (Agreement) an siam thu a tarlang a, an team member hi 12 an nih thu a sawi bawk.

Minor Irrigation Department CE Pu Lalthangliana chuan Minor Irrigation-in hma a sawn theih nan kum 2005-2006 atang khan Japan sorkar an dawrnaah Mizorama Beneficiaries-te chu sum leh paia hmalakpui an inhuam thu an lo hrilh a, mahse Mizorama Beneficiaries ten sum leh pai lam ni lovin Japan mithiamten a hmunah rawn enpui a, an thiamna ngeia Irrigation lama hma an rawn lakpui chu an mamawh zawk nia an sawi avangin anmahni ngei chawkluh an ni ta a ni, a ti. Master Plan hi kumin April thla velah peih hman an inbeisei a ni tih a sawi bawk.

Mizorama irrigation leh agriculture lam kaihhnawih thil zir tura lo kal Japan International Cooperation Agency (JICA) Team member 12 te chu : Shiegi yamaoka, Team Leader (Rural Dev. Planning); Yukuta Murai, Sub-Leader (Rural Dev. Planning); Takafumi Suzuki (Irrigation/Water Resources Dev. Planning); Takuya Saisho (Agri/Paddy Production); Katsuyuki Yamamoto (Horticulture/farmlang Conservation); Tatsuhiko Hiraiwa (Facility Planning/Cost Estimate/Civil Work Planning); A.W.Al-Hanbali (Land Utilisation Planning/Database/GIS); Akeshi Mori (Agro-economy/Marketing/Post Harvest Processing); Junko Saikowa (Rural Society/Rural Orgns/Rural Finance); Takahisa Amano (Training/Coordination/Land Utilisation Planning/GIS); Rouviere (Environmental Social Consideration) leh K.Allapichay (Inland Fishery) te an ni. Japan mithiamten Mizoram hmun hrang hranga Irrigation chungchang an survey hian thla 20 vel a awh dawn a; 2nd Phase chu kumin September thla atanga nakum April thla thleng a awh dawn a. He Project-in a tum ber chu tui lak hmanga thlai chin leh Jhum Cultivation tihchangtlun a ni.