Road Safety Week vawi 25-na chu vawiin khan Parliamentary Secretary, Pu T.T.Zothansanga’n Transport Conference Hall-ah a hawng.

Road Safety Week vawi 25-na hawnna inkhawm Pi Lalzarliani, Director Transport Dept. kaihhruaiah hian Parliamentary Secretary chuan lawmna thuchah sawiin, khawvel hmasawn tehna pui ber chu transport a ni a, Mizoram bikah chuan transport tih hian lirthei lama inkalpawhna leh bungrua thiar a kawk ber a ni tiin, hengah hian chhiatna leh mihring nun hlohna pawh a tam ber thu a sawi a. Kum kalta chhunga lirthei avanga chetsualna hrang hrang tarlangin Pu T.T.Zothansanga chuan heng chetsualna thlen chhan tam ber chu fimkhur loh vang leh rui chunga lirthei khalh chin vang te hi a ni, a ti a. Lirthei chesual zing a 25% zet chu two-wheeler khalh an ni tiin, helmet khum ngaih pawimawh a tul thu pawh uar takin a sawi a ni. Pu T.T.Zothansanga chuan lirthei a tam tial tial a, a khalhtute pawh kan pung tial tial a, hengah hian keimahni bakah midang nun leh bungrua kan kutah a awm a ni tih hria a fimkhur tur leh midang te pawh fimkhur a tulzia hrilhhre thin turin kalkhawmte a chah a ni. Him taka lirthei a kan veivah theih nan Dan ngaipawimawh turin lirthei neitute leh khaltute zawng zawng a chah bawk.

Nikum 2013 chhung khan Mizoramah lirthei chetsualna 114 a awm a, boral 97 leh inhliam 281 an awm a ni. (source: SP Crime, Aizawl)

Road Safety Week vawi 25 na hi vawiin atanga tan niin, tunkar chhung a hman a ni ang.