Lunglei khawpui alo him zawk theihna tura cheng vaibelchhe 1.50 senga ruahman ‘Lunglei Town Surveillance (CCTV) Project’ chu vawiin khan Lunglei High Powered Committee (HPC) Vice Chairman Pu Lawmawma Tochhawng chuan SP Lunglei Office-ah a hawng. 

Hawnna inkhawm Pu C. Lalthanmawia, Lunglei SP kaihhruaiah HPC Vice Chairman chuan Lunglei khawpui tana hmasawnna ropui tak ‘Lunglei Town Surveillance (CCTV) Project’ peih fel a ni chu lawmawm a tih thu sawiin Lunglei mipuite tan ni chhinchhiah tlak leh rahbi thar pawimawh tak a ni, a ti a. He CCTV Project  bultan tu leh a ti hlawhtling tura hun leh tha leh ngaihtuahna nasa tak seng tu HPC Vice Chairman mual liam ta Pu S. Laldingliana chungah lawmthu sawiin Lunglei District mipuite tana a thahnemngaihna chuan rah tha ala chhuah zel a ni, a ti. ‘Lunglei Town Surveillance (CCTV) Project’ chu Traffic Control System atan te, rikrum thilah te, rukruk thilah te a tangkai hle dawn a ni tiin mipuite pawhin neitu rilru an put a pawimawh a ni, a ti a. CCTV Project khawl te chu tha hle in changkang hle mahse a tangkaina tak tak chu a hmangtu mihringah a innghat a ni tiin a enkawltu police te chu fimkhur leh uluk taka enkawl tura chahin he Project ti changtlung zel tura hmalak pui a tum thu a sawi bawk. 

 ‘Lunglei Town Surveillance (CCTV) Project’ hi cheng vaibelchhe 1.50 senga ruahman niin February, 2018 khan Survey neih tan niin June, 2018 khan Mizoram Home Department in Tender a ti chhuak a. RS Traders, Aizawl in CCTV bun hna hi an thawk a. 1^st phase (23^rd August 2018 – 13^th November 2018) leh 2^nd phase (13^th – 28^th June, 2019)  chhungin Lunglei khawpui hmun pawimawh leh lun lai hmun 20-ah te camera hrang hrang 38 bun a ni. (Bullet Type – 34, PTZ – 2 leh Dome Type - 2). Control Room hi Lunglei SP Office ah dah a ni. Police-te CCTV record chhui tir tur hian Lunglei Poilce Station-ah FIR thehluh tur a ni a, he FIR-hi OC in Control Room-ah a refer chho anga, Control Room in charge ten CCTV record an en let na hi OC hnenah anlo thehlut ve leh dawn a ni. Lunglei Police chuan mipuite hnenah ngenna siam in CCTV hi duat taka lo enkawl pui tur leh veng tin mipuiten lo ven pui turin an sawm a ni.