Nimin tlai khan Taxation Auditorium, MINECO-ah National Health Mission, Mizoram in  ni 3 chhung awh Review on Health Programmes under NHM chu khar a ni a.  He hun hi Dr R. Lalthangliana, Health Minister chuan a hman pui a ni. 

NHM Review meeting chuan rah tha a chhuah a beisei thu Health Minister Dr R. Lalthangliana chuan a sawi a. Sawrkarin Hriselna huanga hmalakna a dah pawimawh em avangin ama hovin Health Department hnuaia hmalakna zawng zawngte chu hun remchang hmasa berah ennawn that leh a ni dawn a ni a ti. Dr. R.Lalthangliana chuan hun reilote Health Department a enkawl chhungin nasa taka hmalak a nih thu a sawi a. Hmun kilkhawr zawk te pawh a tlawh tawh thu leh a la tlawh chhoh zel tur a sawi a. Health Minister anga thingtlang hmun hrang hranga damdawiin a tlawh tawh te dinhmun sawiin Health Infrastructure tha din kan mamawh nasat thu a sawi a. Damdawi in tha, thawktu awmna tur hmunhma leh bungraw tha chu hnathawktu tan phurna petu a nih a beisei thu a sawi bawk a ni.

Health Minister chuan tun dinhmunah Health Indicator pawhmawh tak, hriselna kawnga tehfunga hman ber pahnih IMR leh MMR-ah te pawh India rampum dinhmun nena khaikhin chuan kan tha sawt viau a. Hei hi thawktute inpekna rah a ni a ti a. Hetih lai hian AIDS/HIV-ah kan dinhmun a chhe lutuka hnamdang te hmaah pawh hmai a uang thei tawh lova, Damdawi In leh Health Department a thawk zawng zawng te bakah ram mipuiin kan ngaihvena engtin nge kan insiam that ang tih kan ngaihtuah tlan a ngai a ni a ti. Dr. R.Lalthangliana chuan kan dinhmun tha tehchiam lo mahse khawvela NGO tha ber ber te kan neih avangin tan kan la chho leh thei tih a chiang a. NGO te hi kan thawhpui thiam chuan sawt takin hna kan thawk thei a ni a ti a. Kan zaa tan rual a pawimawh ber a ni a ti. 

NHM Review Meeting ni 3-na leh a tawp ni hian Nu leh Nau hriselna lam hawi, State Level Reproductive and Child Health- Half Yearly Review neia hun hman a ni a. A kharna hun inkhawm hi Dr Eric Zomawia, MD, NHM in a kaihruaia,  Dr  Lily Chhakchhuak, SPO(RCH) hnen atangin report tawi ngaihthlak a ni  leh a, hemi hnuah hian Damdawi In lian leh te zinga hnathawk that e hnenah lawman sem a ni.  Lawmman dawngtute chu Sub Centre thaber : Serkawr SC, Primary Health Centre thaber: Sangau PHC, Community Health Centre thaber: Biate CHC, Sub-district Hospital thaber : Kulikawn SDH leh District Hospital thaber : Aizawl Civil Hospital te an ni a. Special Award,  SNCU, Aizawl Civil Hospital in a dawnga, Outstanding Performance Award, Aizawl East District leh Best Performing District, Aizawl East District bawk ten an dawng a ni.