Vawiin khan Tuipui Tlawhchhhan Joint YMA buatsaihin Tuipui lui kam, Khawbung PHE Pump House ah kum 2019 chhunga Tuipui Tlawhchhan Joint YMA sangha fuan ven kharna inkhawm buatsaih a ni a, Fisheries Department Minister Pu K. Lalrinliana'n
khuallian niin he hun hi a hmanpui.

He hun hmanpuitu Fisheries Department Minister Pu K. Lalrinliana chuan sawrkarin lui dung nungcha humhalh tura ngaihtuahna a sen nasat thu sawiin, dan thar "The Mizoram Fisheries Conservation Rewards Scheme, 2019" pawh reilote ah hman theih beisei a ni a ti a. He dan hnuaiah hian dan phalloh a luidung nungcha suat thin te hremna, luidung nungcha humhalh tura thawk nasa te lawmman/tanpuina pek dan tur te ruahman a ni a, mimal/pawl anga luidung kilometre 1 aia thui humhalhtute hnenah lawmman tha tak siam a nih thu te, thuneitute hnenadan bawhchhetute hriattir tu te lawmman tur te, phalna (license) nei te chauhin fee chawi a dan hnuaia luidung nungcha an man theihna tur te leh thil pawimawh dang tam tak dan tharah hian a awm dawn a ni, a ti a. He dan hi sawrkarin hman tura a peihfel a thuchhuah a siam hunah tha taka zawm turin Zoram mipuite a sawm a ni.

Minister chuan Mizoram hi sangha leh luidung nungcha ah kan intodelhlo em em a, sangha pawh ram pawn atang kan lalut nasa em em a, kaikuang phei chu a vang lehzual a, chakai leh chengkawl hi tlemin zia deuh mahse kan intodelh chuang lo a ni a ti a, dan thar chu luidung nungcha a kan intodelhna tura hmalakna a ni tiin, kan humhalh that chuan reilote ah eizawnna atana hmang duh te pawhin bomb, electric current, tur, chinai, dynamo etc hmang tawh lovin dan in a phal chin angin len hmang in hlawkpui tham sangha thianghlim an man thei tawh dawn a, luidung nungcha an rem mai loh nan a kan humhalh that chuan reilote ah kan luidung zawng zawng hi mitin tana sangha dil, chakai meichher chhitna, chengkawl khawrhna ah kan chantir thei dawn a ni a ti.

Minister hian  Tuipui Tlawhchhhan Joint YMA hnenah an mamawh huna an hman atan tangka fai Rs 15000 a hlan a, sangha veng tha branch yma te lawmman tur a tum bawk a ni.

Kum 2019 chhunga YMA branch sangha fuan ven kawnga hnathawk tha tha lawmman sem a ni a, Khawbung Branch YMA leh Biate Branch YMA hnenah chawimawina thuziak leh tangka fai hlan an ni.

Tuipui Tlawhchhan Joint YMA hi kum 2007 khan din a ni a, a huam chhungah hian YMA Branch 13, Khawbung, Zawlsei, Khuangthing, East Lungdar, Sailulak, Leng, Biate, Sialhawk, Sialhawk North, Bungzung, Zawngte Tui, Riangtlei leh Vangtlang te an awm a, heng YMA branch hrang hrang hian Tuipui lui dung tluanin chan an in sem a, kum tluanin sangha an humhalh a, kawng hrang hrangin sangha humhalh chungchang zirtirna an in pe thin a, sangha fuan hun a zirin October-November thla hian an veng ngawrh bik thin a ni. Sangha fuan an humhalhna ni Khawbung pump house bul Tuipui lui kilometre khat vel a thui huam chin ah a ni a, hemi huam chhungah hi chuan kum tluanin sangha leh luidung nungcha khawih/man phal loh a ni a, hemi chin bakah hi chuan len kua kutzungchal tiat ai a zim lo (number 25 chung lam) hmang a man phal a ni a, bomb, electric current, tur, chinai, dynamo etc hmanga luidung nungcha man hi khap bur a ni.

Joint YMA hruaitute chuan kum 2000 vel atang khan Tuipui lui dungah sangha man tur a awm mang tawh lo an ti a, hmun hrang hrang Aizawl atang te hial bomb, dynamo, chinai, electric current etc. hmangin an rawn suasam sak thin a, hei hi an tuar em em a, kum 2007 atanga luidung nungcha humhalh an kalpui hnu ah sangha te an pun chak hle thu an sawi.

Inkhawm hi Pu R. Lalremkunga, President, Tuipui Tlawhchhan Joint YMA in a kaihruai a, Tuipui Tlawhchhan Joint YMA Vice-President Pu Lalniliana hnen atangin sangha humhalh kawnga hma an lak dan ngaihthlak a ni a, Pu K. Lalmalsawma, FEO hnen atang fuihna thuchah ngaihthlak a ni.