Agriculture Department Lunglei hmalakna hnuaia Vaimim herna khawl Maize Sheller, Dawn khuaa Vaimim chingtute hman tur chu vawiin khan Pu Lawmawma Tochhawng, Vice Chairman, High Powered Committee Lunglei chuan a tlangzarh. 

Tlangzarhna inkhawm RMSA High School Building, Dawn a neih hi Lunglei DAO Pu Tlangtimawia Zote in a kaihruai a, khuallian HPC Vice Chairman Pu Lawmawma Tochhawng chuan thu sawiin HPC Lunglei chu hun rei tak hmasawnna hna kawng hrang hranga thawkin hna chi hrang hrang a lo thawk tawh a, tun tumah chuan ei leh bar kawnga mipui intodelhna kawng zawh turin hma a la dawn tih a sawi a, hlawhtlinna nei tur chuan ruahmanna tha leh rintlak a ngai a, kan thlen phak loh ngaihtuah chiam chiam ai chuan kan thawh phak, kan khawih theih nghal hna, rinawm tak leh hmasawn tura kan thawh nghal mai hi hlawhtlinna bul a ni. Tun HPC thil tumah hian in tinin kan mamawh Artuia intodelh turin hma a la dawn a, Mizoramah ar a tui thei a, ram dang artui kan ei reng bikna tur a awm lo tih hi kan ngaihtuah theuh a ngai a ni a ti.

A sawi zelnaah Pu Lawmawma chuan HPC atangin hmasawnna tur sum sawrkarin min pe leh ang, kuthnathawktu ten rinawm taka hnathawka, dik taka sum kan hman a tul a, ka ti ve thei a ni, ka ti ve dawn a ni tih hi rilruah kan neih theuh a tul a ni a ti bawk.

Vawiina Vaimin herna khawl tlangzarhna hunah hian Dr. David Fangzauva AEO Lunglei chuan hmalakna chung chang sawiin Dawn khua leh a chhehvela ram Hectre 10 a chin turin mi 52 te hnenah Agriculture Department atangin vaimin chi tha pek an lo ni tawh a, Fall Armyworm avanga harsatna an tawk chungin mi 28 ten a hringa ei turin cheng 2,50,000 man an hralh chhuah tawh thu a sawi a, nasa zawka hmalak a mihring eisen loh ran chaw tur hniang hnar taka thar chhuaka khawl hmanga her tura hmalak mek zel a nih thu a sawi bawk.

Vawiin a tlangzarh tak Vaimin herna khawl hi chi hnih niin a fang nuaina khawl leh a fang her sawmna khawl te a ni a, tlangzarhna hunah hian HPC Lunglei hmalakna pakhat ran vulh leh a chaw siam kawnga a kaihhnawih Department Agriculture, Vety, Industry, Cooperation leh NABARD aiawhte bakah Maize Grower Society, Dawn ten thu an sawi bawk a ni.