Nimin (1.8.2019) khan Chief Secretary Conference Hall, MINECO ah Chief Secretary Pu Lalnunmawia Chuaungo kaihhruaina in State Level Coordination Committee te chuan 7th Economic Census buatsaih mek a hmalak tawh na hrang hrang thlirletna hun leh Economic survey kalpui dan tur sawi hona hun  an neih.

Chief Secretary Pu Lalnunmawia Chuaungo chuan,” 7th Economic Census kan hmachhawn tur ah hian Mizoram chu state dang aia felfai leh tha a survey kalpui I tum ang u,” a ti a, a hun taka survey hna zo turin leh 7th Economic Census buatsaihna a mahni chanvo theuhte tha taka hlenchhuak turin member te a chah bawk.

He thutkhawmnaah hian Pu H Lalduhsaka, SSO, NSSO, RO, Agartala in powerpoint presentation hmangin Mizoram a survey kalpui dan tur tlangpui a tar langa, harsatna awm thei leh sutkian dan tur memberte nen sawi hona neih a ni bawk.

Economic Census hi 1977, 1980, 1990, 1998, 2005 leh 2013 khan buatsaih alo ni tawh a 2019 hian a vawi 7 na tur a hmalak leh niin kum 3 dan a kalpui ziah tum tawh a ni. 7th Economic Census buatsaihna atan hian Econonmic & Statistics Office, Ministry of Statistics & Programme Implementation, Government of India in a phut angin State Level Coordination Committee, District Level Coordination Committee, State Level Operations Committee-cum-Monitoring Committee leh District Level Operations Committee-cum-Monitoring Committee te din niin hmalak dan tur felfai tak a sem a ni a. Secretary, Planning & Programme Implementation Department chu State Charge Officer a ruat niin District Charge Officer atan district tin a Deputy Commissioner te ruat an ni tawh bawk a ni.

Nodal Officer leh 2nd Level supervisor te thlan chhuah tawh a ni a, DLCC te nen district tin ah meeting neih a hmalak dan turte rel a ni a. Census buatsaih nan hian Nodal officer leh 2nd level supervisor te hian National Orientation Workshop, New Delhi ah training an nei tawh a, State Level Training of Trainers leh District-wise Training of Enumerators te kalpui alo ni tawh bawk a ni. Tum danga Census kalpui dan anglo takin 7th Economic Census hi Digital India zulzuiin lehkhaphek tel miah lova (paperless) kalpui tur a ni a, application leh online a hna hi thawh tum a ni. 7th Economic Census hi Puducherry leh Tripura te chuan July Ni 29 leh 30, 2019 khan survey hi anlo tan tawh a, Mizoram hi phase-1 ah telin August ni 16, 2019 a tan tur a beisei a ni. India ram pumah 7th Economic census buatsaih hna hi Enumerators nuai 9 leh Supervisors nuai 3 in an kalpui dawn a, Mizoram ah Enumerators mi 798, 1st Level Supervisor 184 leh 2nd Level Supervisor 4 ten survey hi an kalpui ve  thung dawn a ni. Survey hna tan atanga thla 2 leh a chanve chhung hi thil tul lak khawm nana hman tur a ni a, thla chanve dang leh hi endik nana hman tur ni leh in Census hi thla 3 chhunga peihfel hman tura beisei a ni.