Nimin tlai khan Mizoram Youth Commission Chairman Dr Vanlaltanpuia hovin Mizoram Youth Commission kal zel dan tur duangin consultation meeting Aijal Club-ah neih a ni a. He meeting-ah hian MLA pahnih Dr. Z.R.Thiamsanga leh Pu L.Thangmawia te pawh an tel a ni.

MYC Chairman Dr Vanlaltanpuia chuan MYC kal dan phung tur policy mumal tak duan chhuah a la awm ngai lo va, Mizoram leh Mizoram thalaite hian engnge an mamawh tak tih zir chianga, inkaihhruaina mumal tak nena kawnghmang leh tum bik neia kal a tul avangin inrawnkhawmna buatsaih a ni, a ti. Mizo thalaite hian theihna sang tak kan nei a, kan hnam suk thlek dan, tui zawng leh thiam zawngte hnaa chan tir dan tur ngaihtuaha policy mumal tak duan tul a tih thu  MYC Chairman chuan a sawi a. Zirna kalphung pangngai kawng zawh hian thalai zawng zawng tan eizawnna kawng a inhawng vek thei tawh lova, chuvangin thalaiten eizawnna tha an neih theihna tura awmze neia kawng dap a, MYC-in bung thar a kai theih nan an theihna leh thiamnate sawm khawma, ngaihtuahna uluk taka seng turin kalkhawmte Dr Vanlaltanpuia chuan a sawm a ni.

Consultation meeting-ah hian MYC ina hna a lo thawh tawh leh thawh mekte tarlan a ni a. Heng bakah hian sawiho tura chhawpchhuah zingah Manpower Development Policy chungchang te; thawktu indaihlohna zirchianga khawi laiah nge, eng hunah nge, eng ang thiamna nge kan mamawh tih zirchianga skill gap research neih te; career guidance chungchang te; Skill Development Institute din chungchang te; Mizo thailaiten pianpui thiamna tam tak an neih hai chhuaha, tangkai zawka hman theih dan tur professionalization of embedded skill te; MYC Job Portal siama hna zawng mekte leh zawngtute inbiakpawhna tur siam te; nitina inhlawh thin labour sector te mumal zawka organised sector-a an luh theih nana ruahmanna siam te; Placement Agency te nena thawhho te; thalaite rilru put hmang leh sukthlek siamtha tura moral reforms kalpuite a tel a ni.

Meeting-ah hian Planning and Programme Implementation Department Secretary Dr.C.Vanlalramsanga, Deputy Adviser-cum-Deputy Secretary Dr.Lalrinchhana, Aizawla Industrial Training Institute leh Polytechnic Principal te leh mi pawimawh dangte an tel a ni.