Lengpui Airport tichangtlung tura hnathawh kal mek enfiah in Chief Minister Pu Zoramthanga chuan tukin khan a tlawh. Chief Minister hi Chief Secretary leh sawrkar department thenkhat a hotuten tawiawmin, Airport Authority of India (AAI) aiawhte leh Aviation Department hotute nen hmalak zui zel dan an sawiho nghal a ni.

June ni 8 khan Chief Minister in Lengpui Airport hi lo tlawh tawhin, hemi hnu hian Runway Resurfacing - runway khawk tawh Ieh rualrem lo Iai te cheithat hna chu thawh tan nghal a ni a. October thlaa airline pahnih - GoAir leh Indigo lo lut tur dawngsawng tura thawh ngai la awmte vawiin hian enfiah a ni a. Isolation Parking Bay siam te, Thlawhna park-na hmun Apron zauh te, Air Traffic Control (ATC) siamthat te, RESA (Runway End Safety Area) siamthat turte chu enho a ni a. Pangpar leh thingkung hmanga airport chei hna Florist Association ten an thawh mek chu a en bawk.

Chief Minister hi AAI atangin Pu Sanjeev Jindal, Regional Executive Director (RED), AAI North East Region leh Pu JT Radhakrishna, General Manager (Project) ten an lo dawngsawng a. Mizoram atangin Finance Commissioner, IGP, Aviation Wing Principal Consultant, leh PWD leh P&E atangin senior official ten an tawiawm bawk a ni.