Vawiin khan Government Mizoram Law College(GMLC) Auditorium ah  zirlai pass chhuakte thlahna leh lut thar te pualin programme hman ani a. He hun hi Higher & Technical Education Minister Dr R. Lalthangliana chuan Khuallian niin a hmanpui .

H&TE Minister Dr. R. Lalthangliana chuan Law graduate te lawmpuina leh zirlai lut tharte fuihna thu sawiin a thiam ber, a tha ber emaw  a nawlpui aia tha zawk tal nih tum turin a chah a. Mizo law graduate te tan High Court a practice leh Judge anga luh bakah Supreme Court-a tam zawk practice leh Supreme Court Judge hna te chu an hmabak la hlen tur a ni a ti.

Ziak leh chhiar lama san a pawimawh ang thovin kan thiam zirna hrim hrim te pawh a chian hle a ngaih thu sawiin degree nei na zawng tan eizawnna tha a tam lo hle a ni a ti. Mizoram mamawh thiamna huapzo zawka zirchhuah nachang hriat tel a pawh tul tih a sawi a. Mizoram hna zawng zawng te chu a ram leilung faten  thawh theih a pawimawh hle a ni a ti.  Tumruhna , taimakna leh thawhrimna lo chu hlawhtlinna damdawi dang a awm chuanglo tih sawiin kum Zabi 21-ah chuan a taima zingah rau rau pawh  a thiamfal te chu chhawr an hlawh bik a. Tun, kum Zabi 21 hian huntha a herchhuah pui rualin inelna leh chona nasa tak mi zawng zawng tan a chhawp tel a. “Tun anga Mizo thalai tam takin phone, games, social media, internet leh inawmtleina tangkai lo tak tak atan hun an khawhral zel chuan kan khawvel danga mite rualin hma kan sawn dawn lo a ni”, a ti a. Mizoram hmalam hun te thui tak thlir a ngai . Hma kan sawna kan changkan ve kan duh chuan mimal tin ten kan hun hman dan te kan chhiar thata, mahnia tih tur in tukin thil tum chiang tak neii hmalam pana ke kan pen theuh a ngai a ni a ti.

Dr. Rualkhuma Colney hnen atangin lawmpuina leh fuihna thu bakah Principal’s Report ngaihthlak a ni a. Kum 2013 September  19-a sawrkar hnuaia College puitlinga hlan khai, Government Mizoram Law College hi kum 1983 August 25 khan Aizawl Law College tih hming phuaha din a ni a. Tun thleng chuan Mizorama Law zirna college kan neih awm chhun a la ni. Tunah hian zitirtu thawk nghet 8 leh a nghetloa thawk 5 awm mekin zirlai 167 an awm mek a ni. A din tirh  atanga tun inkarah, mi 507 te chuan he college atang hian Law Degree an nei tawh a. Heng law graduate zingah hian mi hlawhtling tak tak an awm tawh a. Heng zingah hian Minister leh MLA pawh 6 pawh an tel a ni. Tun hnaia MZU Result hnuhnung berah kha GMLC atang hian zirlai 24 te tha takin an pass a, pass percentage hi 72.72  a ni. GMLC hian College Building bakah mi 21 awm theihna Women Hostel leh Dan lam zirna lehkhabu 12773 awmna, Library changtlung tak an nei bawk a ni. GMLC hian Mizoram State Legal Services Authority(MSLSA) nen tang kawpin zirna bakah thingtlang leh hmun kilkhawr zawkah te an fehchhuak thin a. Heng hunah te hian mipuite leh zirlaite hnenah te dan leh hrai chungchangah te zirtirna an pe thin a ni.

GMLC Freshers’ Social programme-ah hian zirlai titha zual te pualin chawimawina hun hman a ni a. Juniour leh Senior aiawh ten thusawina hun an hmang ve ve bawk a ni. He hunah hian  College Annual Magazine pawh H&TE Minister Dr R.Lalthangliana chuan a tlangzarh nghal bawk a ni.

Attachment

  • Loading attachment...