Vawiin hian Serchhip District Level Co-ordination Committee on National De-worming Day te chu an Chairman Pu R. Vanrengpuia, SDO Sadar hovin a pisaah an thukhawm a. Tun August ni 8 a National De-worming Day hman dan tur an rel.

Serchhip Chief Medical Officer Dr. Laldawnglian Sailo chuan National Deworming Day chungchang sawifiahna nei hmasain he Day hi kum khatah tum hnih neih thin a ni a, a hmasa zawk chu February thlaah niin a hnuhnung zawk chu August thlaah. India rama naupang  kum 1 leh tleirawl kum 19 inkar te zingah thisen tlakchham vanga natna a tlem theih nana hmalakna pawimawh niin Thisen tlakchham natna thlentu langsar ber chu Rulhut a nih avangin Rulhut hlo pek beihpui thlak hi a kalpui ta a ni, a ti.

Meeting chuan he ni hi a hawnna ni 8th August ah hian Anganwadi thlan bikah District Level Co-ordination Committee te nena neih nise a ti a. Hmun dang zawng ami te chu tum danga an lo tih tawh thin angina Education Department te nena tangkawpin school zawng  zawngah he ni vek hian a huhova damdawi ei runpui buatsaih ni se. Anganwadi zawng zawngah neih bawk ni se, chumi hnuah school kal tawh lo, kum 19 leh a hnuai lam te zawn chhuaha ei tir ni se, tiin hmalak dan tur a duang a ni.

Meeting ah hian District Immunization Officer Dr. Lalhlunpuii te, Dr. Samuela, MO te, District Education Officer aiawh te,  Social Welfare aiawh te leh mi pawimawh dangte an tel a ni.