Vawiin hian DC meeting Room ah Serchhip Town Sanitation Task Force te chu an Chairman (Deputy Commissioner aiawhin) SDO Sadar Pu  R. Vanrengpuia hovin khawpui chhunga Village Council aiawhte nen an thukhawm a. Mizoram sawrkar dan thar, Mizoram Solid Waste Management By Laws, 2018 in a phut angin chhungkaw tin leh in tinin bawlhhlawh paih man an chawi tur zat te, vantlang hmun leh kawtthler tibawlhhlawhtute hremna tur te an rel.

Chairman Pu R. Vanrengpuia chuan, India ram pumin faina lama hmalakna nasa tak a kalpuina kal chho zelah Mizoram pawhin theih tawp a chhuah zel a. Kan bawlhhlawh te paih mai mai lova uluk taka umzui dan a duang a. Solid Waste Management Rules thar kan nei a, chu dan ang chuan khawpuia cheng mitin, chhungkaw tinin faina kawngah mawhphurhna kan nei ta a ni. Danin min phut avangin ‘keini veng chuan kan ti ve thei lo emaw keini chhungkua chuan kan ti ve dawn lo’ tih a rem tawh lova, khua leh tui tha kan nih angin kan faia kan lo thianghlim zawkna tur ruahmanna te kan zawm tlan a tul a ni, a ti.

Pi Vanthangpui DUDO in khawpui huam chin tana bawlhhlawh paih man bituk awmsa entawn theih tur chi a chhawp chhuak a; chumi behchhan chuan member ten Serchhip khawpui mil tawk leh kan tlin tawk  tur nia hriatah Committee hian ruahmanna an siam ta a ni.

Serchhip khawpui tana rate thar ah hian; chhungkaw (household) tinin thlatin Rs. 20 bawlhhlawh paih fee an pe ang a, dawr leh sumdawnna hmun te chu an lenzawng a zirin Rs. 50-150 inkar bithliah a ni a. Mikhual thleng thin in te, Hotel te, Industry tenau te, puipunna Hall te, Office te, Hawkers te pawhin an pek tur zat rate bithliah sak vek an ni. Heng fee lak khawm hna hi Village Council tinte kutah an huam chhunga mi theuh lo bawhzui tura rel a ni a. Village Council te chu an huam chhungah kartin bawlhhlawh paih motor vawi khat tal lo kal tir ve (UD&PA kal tir bak) tura beisei an ni bawk.

Heng bakah hian vantlang hmun tibawlhhlawhtute hremna (lei chawi) tur rate pawh bithliah a ni a, kawtthler/ kawngpuia bawlhhlawh paih man te chu Rs. 100, chil chhak Rs. 100, inbual leh insu Rs. 100, Kawngsira zung Rs. 150, kawngkam emaw vantlang hmuna e (inthiar) Rs. 250 te chawi tir theih an ni ang a, kawngah ui a eka a neituten an then loh chuan a neitute chu Rs. 150 chawi tir theih a ni bawk ang. Tuallaia bawlhhlawh hal chu Rs. 5000 - 25000 thleng chawi tir theih an ni ang a, mahni huan thlai thing sat thla a paih mumal leh silo emaw fel taka umzui leh silo te chu Rs. 100 chawi tir theih an ni bawk ang.

Heng te hi a langsar zualte an ni a, chipchiar takin mipuite hnenah inzirtirna leh inhrilhhriatna a la awm zel tura ngaih a ni.

Meeting ah hian member te an kal tha hle a ni.