1786/2024-2025

2024 Thlazing ni 28: Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan August ni 27 leh ni 28, 2024 khan a bial chhunga khaw pathum - Thiltlang, Pangzawl leh Rawpui te tlawhin, mipuite'n a hnena an mamawh an thlenna hun (public interview) a buatsaih.

Pu V. Malsawmtluanga hian ni 27.08.2024 (Thawhlehni) khan Thiltlangah a mamawh apiangte'n amah an dawr theihna hun a hawng a, khawtlang mipuite'n an hlut hle. Inkawmna hun hman zawh hnu hian Thiltlang Primary School-II leh Health & Wellness Centre te chu a hmunah a tlawh a. Thawktute'n harsatna leh mamawh an neihte chu bialtu MLA hnenah hian lo thlenin, Pu V. Malsawmtluanga chuan an harsatnate chu a theih ang anga sut kianpui a tum thu a sawi a ni.

Pu V. Malsawmtluanga hian Hnahthial District Urban Development & Poverty Alleviation (UD&PA) staff-te leh Thiltlanga tlawmngai pawl hrang hrangte chu bawlhhlawh paihna hmun (dumping ground) chungchang a sawi hopui bawk.

Pu V. Malsawmtluanga hian Pangzawlah zan riakin, vawiin, ni 28.08.2024 (Nilaini) khan Pangzawl North VC House-ah public interview hun a buatsaih a. Hemi hnu hian Rawpui pan lehin, Rawpui VC House-ah public interview a buatsaih leh bawk.

Bial chhung mipuite chuan a office-a kal chilh kher ngai lo va, an khua ngeia an mamawh an thlen theihna hun hawnsaktu MLA an nei chu lawmawm an tih thu sawiin, bial chhung tana a hmachhawp te ṭha taka thawk zel tur leh hriselna ṭha zawk nena bial vil chhunzawm zel turin bialtu MLA Pu V. Malsawmtluanga hi duhsakna an hlan a ni.

Pu V. Malsawmtluanga hian a bial fannaah hian khawtlang hruaitute kutah silpaulin, volleyball leh football te a hlan nghal bawk a ni.