1787/2024-2025

Kolasib Dated the 28th August, 2024: Tukin khan Kolasib Deputy Commissioner, Kolasib Office kawt tualzawlah Cleanliness Drive on Safai Abnao Bimaari Bhagao Campaign (SABB) hman a ni a. Pu Lalfamkima, Dy Speaker leh MLA nibawk chuan Khuallian niin he hun hi a hmanpui.

Khuallian chuan  khawchhe tak hnuaia programme ngai pawimawha kal khawm te chibai bukin, kal khawm te hnenah Programme an kal chhan anga faina leh thianghlimna an nun pui a pawimawh thu sawiin, fai tur chuan rilru put hmang thlak a ngai a, invawnfai leh inuluk a ngai a ti a. Faina leh thianghlimna kawngah mimal theuha bul tan a pawimawh thu sawiin, fai chuan hriselna a keng tel a, bawlhhlawh pawh kan ngai thei lo ang a ti a. Bawlhhlawh paihna tur hmun ni lova paihin kan lui tui leh tui tlan te a tihbawlhhlawh theih dan sawiin, hengte hi a thlen loh nan thuneitu ten bawlhhlawh bawm in tina an semah lo paih zel turin kal khawm te a fuih a, fainain natna tamtak lak ah min chhanhim theih avangin vantlang mipui tanrual a pawimawh thu a sawi a. Kolasib khawpui chu khawfai ber a ni theih thu a sawi bawk.

He hun kaihhruaitu Pu Robert C. Lalhmangaiha, Kolasib DC chuan thianghlimna leh faina hi nun pui ila, keimahniah bet tlat sela chu chuan natna kan um bovang a ti a. Fur laiin natna tam hun lai a ni a ti a. Mi thenkhat inthlahdahte avanga harsatna kan tawh theih dan sawiin, faina leh thianghlimna kawnga tanrual a pawimawh thu a sawi a. Kan khawtlang, kan chenna leh kan hnathawhna ah fai leh thianghlimna uar deuh deuh turin kalkhawmte a chah a ni. 

He hunah hian  Rev. C. Lalremsanga, Member Mizoram Kohhran Committee, Kolasib chuan hunserh a hmang a. Tv. Andrew Laltlankima, Swachh Bharat Mission, Brand Ambassador, Kolasib chuan kalkhawmte faina thutiam neihna a kaihruai  a. Pi Josephine Zonunsangi, DUDO & Member Secretary, Kolasib Town Sanitation Task Force chuan lawmthu sawina hun a hmang a. Deputy Commissioner, Bangla venglai Kolasib atangin DC Office kawt tualzawl thleng kawng zawh a ni. 

He hunah hian official te, Self-help group hrang hrang te leh School naupang, school pasarih a tangin an kalkhawm a ni.