1333/2023-2025
Lunglei the 1st August, 2023 : Vawiin tlai khan Pu Lawmawma Tochhawng HPC Vice Chairman Lunglei kaihhruaiin DC Conference Hall ah Lunglei khaw thlanglam NH-302 kawng chhiat chungchanga hmalakna kal zel dan tur ngaihtuahin an thukhawm. He hunah hian Dr.K Pachhunga Vice Chairman Bamboo Development Board,MLA, Pi Ramdinliani Deputy Commissioner, Pu Rahul Alwal SP, Pu Donny Lalruatsanga Addl. DC te leh Chhimthlang Maxicab hruaitu te, NHIDCL,BRN, Infrastructure Private Limited, ZDU Lunglei te an tel a ni.
Tunlai ruahsurin NH-302 kawng a tih chhiat avangin Lunglei Chhimthlang Maxicab Service zawng zawng te chuan thu leh awm hma chu ni 24.7.2023 atang khan tiam chin awm lova service loh ni se tih an rel a. Hemi chungchang a meeting ah hian NHIDCL hnuaia Contractor BRN Infrastructure Private Limited te chuan Maxicab Service loh chhung hian thawktu te leh hmanrua te la khawmin Ni 26 July-28 July, 2023 (48hrs) chhung khan kawng siam hna te hi thawh chhunzawmin tun dinhmunah kawng hi duhthusama siam ala nih loh avangin Ni 4 August 2023 zing 6:00Am atanga Ni 6 August 2023 zing dar 6:00Am chhung hian MMV leh HMV (407 chunglam) tlan phal a ni dawn lova, Contractor hmasa SRK Construction ten hna an chhunzawm theih tak loh avangin an hna hi BRN, Infrastructure Private Limited ten an thawk chhunzawm dawn a. Khawl leh thawktu te pawh a hmun (Side) ah in dah fel tawhin hna hi an tan thei tawh a, amaherawh chu motor veivak a tam thin a, abik takin lirthei lian chi a tan thin avangin an khawlte hmanga hnuhchhuah a ngaih thin avangin hei hian an hnathawh a ti muangin kawng siam hna tluang taka an thawh theih nan motor lian (407 chunglam) tlan hrih lo tura mipui te ngen leh hriattir an ni.
