1334/2023-2025
Aizawl the 1st August, 2023 : Vawiin kan Pu Lalruatkima, Rural Development Minister chuan a MLA fund hmanga siam, Dawrpui Vengthar YMA Committee Room nuai 3.5 senga chei ṭhat leh, Badminton Carpet nuai 3.5 senga phah thar hawnna hun a hmang.
Hawnna hun hman zawh hian YMA Committee Room-ah Local Council, YMA hruaitute, Badminton Club hruaitute leh khawtlang hruaitute nen inkawm hona hun hman a ni a. He hunah hian Minister Pu Lalruatkima chuan thusawiin, "YMA awm ta lo ila hmeithei leh pachhia te tan a rapthlak hle ang. Khawtlang pa nih tling, ram leh hnam pa nih tling YMA kan nei hi a lawmawm tak zet a ni," a ti.
Bialtu MLA ni bawk Pu Lalruatkima chuan, "Zawlbuk kan neih tak loh hnuah kan institution pui ber chu YMA a lo ni ta a. Eizawnna avangtein kan nunphung nasa taka a danglam tawh chungin YMA-in veng hrang hrangah inkaihhruaina dan kan la nei a, a ṭha hle a ni," a ti a. "YMA ropui zia hi mi tam tak hian kan la hmu thiam lo zawkin ka hria. YMA chuan an mamawh an sawiin mite, mamawhtute tana dil leh sawi an ni ṭhin. YMA hi ṭanpui ngaite ṭanpuitu a nih angin ṭanpui ngaite tan engtik lai pawhin kan ding tur a ni," a ti.
Pu Ruatkima chuan YMA-in Myanmar, Bangladesh leh Manipur aṭanga kan unau raltlante a lo chhawmdawl dan chu lawmawm a tih thu a sawi bawk a ni.
He inkhawm hi Dr Lalrinawma Hnamte Dawrpui Vengthar YMA President-in a kaihruai a ni.
Attachment
- Loading attachment...
