Nimin ni 15.9.2015 khan Lunglei Vice-Chairman Pu S.Laldingliana chuan ama bial Lunglei South chhunga ‘Model Village’ atana thlan Mualcheng ‘S’ chu a tlawh a. Mualcheng ‘S’ chu Model Village atan thlan an nih tak avangin nimin khan Lunglei BDO leh Model Village Charge Officer ni bawk Dr.Malsawmtluanga Fanchun kaihhruaina hnuaiah ‘Awareness/Sensitisation Programme for Adarsh Gram under SAGY’ hun hman a ni a, hemi rual hian ‘Free Medical Health, Veterinary leh Horticulture Clinics’ neih a ni nghal bawk.

Mualcheng ‘S’ Community Hall-a Sensitisation Programme hawnna inkhawmah Pu S.Laldingliana chuan a bial chhunga khaw 30 chuang zingah Mualcheng ‘S’ chu Model Village-ah thlan a nih theih chu a lawmpui thu a sawi a. ‘Model Village’ chu khaw dangte aia entawntlak khua tihna a nih angin sorkarin an khua hmasawnna tura hmalakna a neih tur apianga khaw mipuiten theihtawp lo chhuahpui a pawimawh hle dawn a ni, a ti. Mualcheng ‘S’ panna kawng siam mek chu nakum March thlaah zawh theih turin theihtawp chhuah mek a ni tih sawiin Pu S.Laldingliana chuan ‘Model Village’ an nihna chu zawi zawiin a rawn lang chho zel dawn a ni duhsakna a hlan a ni. He inkhawmah hian Lunglei BDO leh Model Village Charge Officer ni bawk Dr.Malsawmtluanga Fanchun pawhin Model Village-in a ken tel thil hrang hrang sawizauvin khaw mipuite vaihlo laka fihlim, polythene hman tlem, 100% ziak leh chhiar thiam tir, 100% nausen/naupang leh ran te vaccine pek te, 100% registration of births & deaths, tui thianghlim leh hnianghnar an dawn theih nana hmalak te, in tin tan inthiarna mumal(toilet) sak sak te, BPL tihhniam/tihrem leh zaa za khaw mipuite bank account neih tir te a ni, a ti a. Mualcheng ‘S’ khaw mipui NREGA hnuaia Job Card nei zawng zawngten bank account an nei vek tawh thu a tarlang bawk. Pu V.Lalmuanpuia, Addl PO(NREGA), Lunglei RD Block chuan Saansad Adarsh Gram Yojana(SAGY) chungchang sawizauvin SAGY-in a tum ber chu thingtlang mite hmasawnna a ni a, thingtlang khaw mipuite rilruah hlutna tuh a, midangte entawntlaka chhuah a tum a ni, a ti a. Mimal leh khatlang hmasawnna tur duan SAGY-in thil hlut tura a tihte chu - mipuiten anmahni tana tha tur rotling buatsaihnaa tel ve, thingtlang mirethei ber leh chak lo berte hmakhua leh hamthatna, mipa leh hmeichhia intluktlanna leh hmeichhe zahawmna chawikan, mipui vantlangte tana rorelna dik, kuthnathawk mite zahawmna humhim, leilung dan kalhmang(environment) nena inmila chen, faina chawisan, hnam rohlute humhalh te a ni. Sensitisation Programme-ah hian Department officals kalte pawhin an hmalaknate sawizauvin mipuite hriattur thil pawimawh hrang hrangte an hrilh a ni.

Nimin Free Medical Clinic-ah mi 181 lai a thlawna entir an awm a, Malaria hrik pai pakhatmah hmuh a ni lo bakah tha/thazam natna vei an awm lo bawk a ni. Naupang zingah thawhhah leh awmna(RTI) a hluar a, nuho zingah zunkawng tha lo(UTI) tam thu report a ni. AH&Vety Department ten Free Vety Clinic an hawnah khaw mipuiten an ran vulh hrang hrang an entir bawk a, Horticulture Free Clinic an hawnah sawhthing ching mi 30 chuang hnenah sawhthing tam damdawi a thlawnin pek an ni bawk.

Model Village Mualcheng ‘S’ tlawhnaah hian District Departments Heads hrang hrang - CMO Dr.VLMS Dawngliana, DAO Pu J.Rothanga, DHO Pu Vanlalnuntluanga Renthlei, Soil & Water Conservation Officer Pu Birminghama, District Veterinary Officer Dr.Vanlalbuanga, EE PHE Er.J.Kapkima, EE PWD Er.Lalchhuana, District Research Officer Pu Zarmawia, District Forest Officer Pu H.Lianmawia leh DIPRO Pi Mina Zoliani ten HPC Vice-Chairman hi an tawiawm a. Mualcheng ‘S’ khawtlangin Model Village lawmna ruai an buatsaih chu tlaiah an kilho a ni.