Nimin khan Lunglei HPC Vice-Chairman Pu S.Laldingliana chuan Ngenrual, Thingfal-ah Agriculture Department hmalakna pawimawh tak pakhat 'Custom Hiring of Farm Machineries' a hawng.

Custom Hiring (Farm Machineries) hawnna inkhawm Lunglei DAO Pu J.Rothanga kaihhruaiah Khuallian Pu S.Laldingliana chuan Ngenrual zau kum 20 vel enkawl tawh loh chu loneitute hmakhua ngaiin Agriculture Deaprtment chuan a rawn thar thawh leh chu a lawmawm hle a ni, a ti a. Sorkarin Thingfal khua kuthnathawktute a ngaihsak a ni tih a lang hle a, chuvangin kuthnathawktute pawhin lawm nachang hria a, theihtawp chhuah turin a fuih. Ngenrual zau Project bikah 'link road' ram cheibawl nan cheng nuai 60 a rawn lut tawh a, 'rainfed' atan cheng nuai 50 hmuh a ni leh dawn a ti bawk. Sorkar chuan kuthnathawktute leirem an rah ve theih nan NLUP a sem a, sorkar duhsakna te hi chhanlet ve a ngai a ni, a ti. Taimakna leh thawhrimna nena thawkin SRI technology hmanga buh thar tam theuh turin a duhsakna a hlan a, Mizoram buh leh bal leh sum dinhmun chawikangtu ni theuh turin a chah bawk a ni.

SDAO Pu Lalhmingmuana report tarlan danah chuan Ngenrual zau-ah hian chhungkua 50 tan SRI technology hmanga buh hlawk zawka thar dan hman a ni dawn a, a chi pawh China buh chi tha (hybrid rice) sem a ni. Kum 2013-2014 chhungin RKVY Scheme hmangin Ngenrual zau ram hectare 25 chu sorkar hmalaknain cheithat a ni leh a; RKVY sum zaa 95% hmangin loneitute mamawh hrang hrang - tractor, rotator, reaper - te lei nan Rs. 10,82,923/- hman a ni a, 5% chu loneitute thawh tura tih a ni thung a ni. RKVY Scheme-in a tum ber chu khawvela mihring pun dan leh changkan chhoh zel dan mila buh china buh thar tihpun a ni.

Nimin a hawn tak Farm Machineries Custom Hiring hnuaiah hian loneituten Tractor an hman hi kum khat chhung Agriculture Department-in a hawh tir ang a, a kum leh a an tihthat chuan neih hlen tura pek an ni ang.

HPC Vice-Chairman Pu S.Laldingliana hian Thingfal atanga 4 kms-a awm Ngenrual zau chu a hmunah a tlawh nghal bawk a ni.