North Eastern Council(NEC) a Secretary Pu Ameising Luikham chuan nimin khan NEC hnuaia HRD&E Sector,a Hmarchhak State hrang hrang te project kalpui mek leh hmalakna te bihchiang turin Hmarchhak State hrang hrang a Education Department hotute a kawm a. Secretary hian official meeting a tel te chu a hun taka an hmalakna te felfai tak leh tha taka thawk zo hman turin a hrilh a ni.

Hemi ni vek hian Education sector a Regional plan kalpui dan tur relin Prof. Ashok K. Dutta, NEC Member, Pu M.P. Bezbaruah,NEC member leh NEC hotu dang ten meeting an ko chhunzawm nghal a.He hunah hian Tripura University, Nagaland University leh Dibrugarh University a Vice Chancellor-te bakah IIT, Gwahati, NERIE, UGC leh State hmarchhak State hrang hranga Education department Official-te an tel a. Lehkha zir chhunzawm lova bansan ta mai an tam ta lutuk tihziaawm dan tur te, science leh mathematics ziruar a pawimawhna te, laboratory changtlung zawk siambelh dan tur te, Hmunkilkhawr deuhva zirna hmun a hostel sakbelh chungchang te bakah University chin a centre of excellence tam tak din dan tur chungchang te sawi ho a ni a. Hmarchhak huam chhunga Industry te leh University-te inkara inlaichinna tha zawk leh inhman tangkai tawnna kawngte ruahman a tul zia meeting ah hian sawi lan a ni bawk a ni.