Higher & Technical Institute, Mizoram (HATIM), Lunglei chuan vawiin khan Saikuti Hall-ah ‘6th HATIM Graduation Ceremony’ an hmang a, he hunah hian Lunglei Vice-Chairman Pu S.Ladingliana chu Khuallian niin zirlai pass chhuakte zinga titha zualte hnenah Award a hlan nghal a ni.

Graduation Ceremony HATIM Principal Dr. Chawngthanpari kaihhruaiah Khuallian Pu S.Laldingliana chuan kumin hi zirna lamah Lunglei tan kum tha a ni a, HSLC & HSSLC-ah te Toppers kan nei a, kumina Nurse Graduate zinga topper kan nei bawk a, HATIM atangin zirlai 53 laiin hlawhtlinna an hmu leh a, chuvangin Lunglei tan kumin hi bultan that lehna kumah chhiar theih a ni, a ti. HATIM chu zirna in naupang te, kum 8 chauh hmel hmu ni mahse Mizorama zirna in zinga hlawhtling ber pawl leh Topper pawh engemawzat an nei tawh avangin an chhuanawm hle a. HATIM chu ramchhung chauh ni lovin rampawnah pawh mi hriat hlawh tan tak, zirna in hmingtha niin Lunglei timawitu an ni, a ti. Mizoram Chief Minister leh Lunglei HPC Chairman ni bawk Pu Lal Thanhawla duhsaknain sorkarin HATIM Campus thar Kawmzawl, Pukpui-a sak mekah tuizem siamna tur Cheng nuai 15 a pe dawn tih a puang bawk.

Baptist Church of Mizoram hnuaia enkawl HATIM hi ni 21 June, 2007 khan din a ni a. Technical leh Professional Course zirna bik a nih angin HATIM-ah hian Computer Sciences, Commerce, English, Social Work subject-te zirtir a ni. Zirlai 29 leh thawktu 13 chauh nen bultanin, kum 8 chhungin zirlai 418 nei tawhin, vawiin thenga graduates an neih tawh zat chu 118 a ni. Chung zingah Top Ten-a lang tawh zat chu mi 50, Topper 6 leh Distinction-a pass tawh zat chu mi 15 an ni.

HATIM Principal Dr. Chawngthanpari’n Report-a a tarlan danah HATIM Campus tur hi Kawmzawl, Pukpuiah buatsaih mek zel a ni a. Sports Minister Pu Zodintluanga chuan an campus chhunga playground changtlung tak an neih theih nan cheng nuai 40 a pek bakah Social Welfare Minister Pu PC Lalthanliana pawhin Girls Hostel sakna tur Cheng nuai 360 a ngaihtuahsak avangin Principal chuan lawmthu a sawi bawk a ni.