Vawiin khan NLUP Implementing Board Chief Media Officer Pu David L Thangliana chuan Lawngtlai khawpui chhunga NLUP dawngtu thawk thate a tlawh kual a, tha taka NLUP an kalpui avang leh an hlawhtlinnaah lawmthu a hrilh.

Pu David L Thangliana chuan NLUP chu Mizoram sawrkar Flagship Programme a ni a, theih tawp chhuaha a dawngtute leh a thawktuten kan bawhzui hi kan mawhphurhna a ni, vawiina NLUP dawngtu hlawhtling tak tak hmuh tur awm te hian ram hmasawnna atan hlawk takin tha an thawh ve tihna a ni a, a eiraltu nilova a thawkchhuaktu an nih avangin chawimawi pawh an phu a ni a ti.

Pu David L Thangliana hian NLUP a mi hlawhtling te pual Television Programme siam pahin Lawngtlai khawpui chhunga AH & Vety leh Industries Department kaltlanga NLUP tanpuina dawngtu chhungkaw engemawzatte a tlawh kual a, an hmalak dan leh hmasawnna an hmuh chhoh dan te, tun dinhmuna an harsatna tawh te zawtin chipchiar takin a kawm hlawm a ni. Lawngtlai khawpui chhungah hian NLUP hlawhtling taka kalpui engemawzat an awm a, an zinga a ti tha zualte phei chuan thla khatah Rs 70000.00 lai te an thawk chhuak thei a ni. Heng ti tha zualte hi Bawng lian vulhtute, Furniture Workshop siam te, Auto-Works neite leh Vawk vulhte an ni a, trade dang atanga hlawhtling taka NLUP kalpui pawh chhungkaw engemawzat an awm.

Chief Media Officer hi Lawngtlai District NLUP Line Department hotute leh Nodal Officer te bakah District Media Officer ten an tawiawm a ni.