Vawiin chawhnu dar 1:00 khan Saiha DC Conference Hall-ah, Saiha District Vigilance & Monitoring Committee ten meeting an nei a, meeting hi DLV&MC chairman Pu CL Ruala, MP(LS) in a kaihhruai a ni. Vawiin meeting-ah hian Centrally Sponsored Scheme (CSS) khawih Department ten 2014-2015 last quarter( lst January-3lst March) chhunga an hnathawh leh hmalakna hrang hrangte huang zau taka sawihova thlirletna hun hman a ni.

 Vawiin Last Quarter Review meeting-a thil sawi ho langsar zualte chu:

 1) Saiha District-ah IMR-ah hmasawnna a la awm lo chauh ni lovin, 3rd Quarter a mi aiin a sang zawk a, tun last quarter chhungin nausen thi 55 an awm,

 2) Last Quarter-ah hlan MGNREGS hnuaiah ni 4 inhlawhna chauh siam a ni,

 3) 2015-2016 a tan BRGF hi Delink a ni tawh a, 2014-2015 a sum hmuh tur Cheng vaibelchhe  11.43 pawh ni 28/08/2G14-ah MoPR atanga released a nih tawh laiin, Finance Department-ah hun engemaw chen a tangkhangin, tunah RD Directorate-ah a tang leh mek a ni.

 4) PMGSY hnuaia kawng siam hna pahnih: Kawlchaw- Serkawr kawng leh Siachangkawn-Vawmbuk kawng pavement works chu Re-Tender  a ni. Heng kawng 2 siamtu contractor te hi an hnathawh that lo avanga an contract terminate tawh te an ni,

 5) Cheng Vaibelchhe 9.41 senga siam Tuipang WSS chu zawh tawh a ni a, 11th Dec, 2014 atang khan mipui hnenah tui pek chhuah tawh a ni a, Official a  commissioned erawh a la ni lo,

 6) P&E Department chuan Saiha District  chhunga thingtlang khua 16-ah New Electrification zo tawhin, khaw khatah chiah la zawh loh a ni a, chu chu Khaikhy khua a ni. Thingtlang Khua 35-ah Intensive Electrification pawh zawh tawh a ni a. Khaw khatah chiah la zawh fel loh a ni a, chu chu Siasi khua a ni,

 7) Divisional Horticulture Office Saiha chuan MIDH leh IWMP sum atangin Solar Panel Module 16 hmangin, Riasihkah leh Rawmibawk khuaah tui pump luhna tur an siam mek, tui hi 2.3Km a hla atanga pump chhoh tur a ni a, chhungkaw khatin nitin tui Litre 370 vel dawng thei tura beisei a ni.