Vawiin  khan Union Minister of State for Home Affairs Pu Kiren Rijiju chuan Bangladesh nena insumdawn tawnna hmun tur Integrated Check-post (ICP), Kawrpuichhuah a tlawh a; Mizoram sorkar aiawhin Parliamentary Secretary Pu Joseph Lalhimpuia leh Pu Shahrawat, Chairman, Land Port Authority of India ten Aizawl atangin Union MoS hi an tawiawm a. Lunglei atangin Lunglei DC Pu Ashish Madhaorao More leh Lunglei SP Pu Zosangliana bakah border vengtu BSF hotute pawh vawiin meeting-ah hian an tel ve a ni.

Union MoS Pu Kiren Rijiju chuan Kawrpuichhuah ICP chu hun rei tak tihhlawhtlin loha a awm chu pawi a tih thu a sawi a. Hmarchhak state-te hi Delhi (Central) rinchhan reng tur kan ni lova, keimahnia intodelh thei turin ram tha tak kan nei a, ram dang nena insumdawn tawnna (border trade) pawh ti khawtlai tawh lovin, a hlawhtling ngei turin chak zawka hmalak a ngai a ni, a ti. Mizoram state sorkar nen thawhhona tha tak an nei theih chu lawmawm a tih thu sawiin kar khat chhungin broder trade kalpuina tur mamawh chu state sorkar hnenah hriattir a ni ang a ti a. Parliamentary Secretary Pu Jospeh Lalhimpuia chuan state sorkar-in thla khat chhungin chhanlet ngei an tum tur leh Delhi-ah amah hnenah ngei rawn thehluh an tum ang tiin Union Minister hi a hrilh a ni.

Parliamentary Secretary Pu Joseph Lalhimpuia chuan, ICP Kawrpuichhuah atan hian kum 2005 khan M/s Rites Ltd. ten Home Ministry hnenah an survey report an lo thehlut tawh a, amaherawhchu kumin kum tira Union Home Secretary hova an meeting-ah tih tawp mai an rawt chu Mizoram Chief Minister Pu Lal Thanhawla’n Union Home Minister Pu Rajnath Singh hnenah thlenin India ram zalen (Indian Independence) hma daih tawh atanga he hmun hi Mizote chhuahka pawimawh tak pakhat a nih thu leh Mizoram tana a pawimawh zia thu a thlen angin, he hmun tihchangtlunna tur leh border trade lam pawh chak zawka kalpui a nih theih nan sorkar laipui chuan a rawn tharthawh leh ta a ni, tih a tarlang bawk. 

India Prime Minister Pu Narendra Modi-in karleha Bangladesh a tlawh hunah Kawrpuichhuah ICP border trade hi an sawiho tur agenda pawimawh zingah telh a nih ngei theih nan theihtawp chhuah a tum thu Pu Rijiju hian a sawi a. Union MoS hi nimin khan Mizoram rawn tlawhin Aizawl-ah a rawn thlawk lut tawh a, vawiin Tlabung-a high official meeting an neih zawhah Guwahati panin a thlawk chhuak nghal a ni.