Vawiin khan Nursing School Lunglei chuan ‘17th Batch Graduation Ceremony’ an hmang a, he hunah hian HPC Vice-Chairman Pu S. Laldingliana chu Khuallian niin he Nursing School atanga kumin General Nursing & Midwifery (GNM) Examination 2015-a Topper Irene N.Lalhmaruaii bakah nurse graduates mi 15-te zinga a titha zualte hnenah lawmman a sem nghal a ni.

Khuallian Pu S. Laldingliana chuan thu sawiin vawiin hi Lunglei tan ni chhinchhiah tlak tak a ni a, chawhma lamah MZP buatsaihin kumina HSLC & HSSLC Topper-te chawimawina hun hman hnuah Mizoram pumpuia GNM Examination 2015 Topper nei thei Lunglei Nursing School Graduation inkhawm a hmanpui thei chu a lawmawmin a ropui hle a ni, a ti. Nurse zirchhuakte chu khawi hmunah pawh thawk se, Pathian rawngbawlna a ni tih hre reng a, an thutiama an chham angin damlo zingah thliar bik nei lova rinawm taka an hna thawk turin a chah. Nursing School hmasawnna tur atan chuan Lunglei HPC a inhawng reng a ni tiin School hotute ngenna angin nurse zirlaite tan ‘Study Tour’ pawh ngaihtuah sak an ni ang, a ti bawk.

Nursing School Lunglei Principal Pi T.Rozami pawhin thusawiin GNM graduates 17th batch hlawhtling taka zirchhuakte chu lawmpuina leh duhsakna a hlan a; an school building cheithatna tur an dil chu ngai pawimawhin HPC kaltlangin tanpuina sum pek an nih avangin HPC Vice-Chairman Pu S. Laldingliana chungah lawmthu a sawi bawk. Vawiin inkhawmah hian Nursing School Warden Pi J.Biakthuami chuan Nurse Graduates 15-te hnenah Certificates hlanin Thutiam chhamna hun a kaihruai bawk a ni.

Nursing School Lunglei hi 1st December 1995 khan din tan a ni a. Centrally Sponsored Scheme (CSS) hnuaiah awm phawtin, July 2000 atangin Mizoram State sorkar-in a enkawl ta a ni. He Nursing School-ah hian General Nursing & Midwifery (GNM) zirtir a ni a; GNM Course zir tur hian Pawl 12 pass, 40% mark hmu chin a ngai a, kumin 2015 atang hian kum 3 Course zir a ni ang. Ni 23 September, 1998 khan Indian Nursing Council atangin pawmna (recognition) hmu a ni a, kumtin zirlai 20 lak phalsak a ni.

Nursing School Lunglei hi Mizoram sorkar hnuaia nurse zirna awmchhun a ni a, tun dinhmunah he School-ah hian Principal-1 leh Tutor-7 awmin thawktu dangte nen an vaiin mi 30 an thawk mek a ni. He school atanga nurse zirchhuak zawng zawng hi mi 282 an tling tawh a ni.