Vawiin khan Govt. Middle School Phairuangkai- ah ‘Total Literacy Drive 2015 in Lunglei District’ hawnna neih a ni a. Hawnna inkhawm hi Pu R Laldawngliana DPC & Secretary, Dist Working Committee-in a kaihruai a, Pu HS Zosangliana, DEO Lunglei & Chairman, Dist Working Committee chu Khuallian a n. He hunah hian Pu H Zahmingthanga, DAEO leh Pu Lalthanmawia, VCP Phairuangkai te pawhin thu an sawi a, Animator leh Adult Illiterate te bakah NGO leh zirlaite an kal tha hle a ni.

Lunglei DEO Pu HS Zosangliana chuan thu sawiin Mizoram hian puitling ziak leh chhiar thiamlo te thiamtirna kawngah nasa takin hma a sawn reng a, 2001 Census-a 88.49% chu 2011-ah chuan 91.33% a lo ni ta a. Amaherawhchu, state dangte pawhin nasa taka tan an lak ve zel avangin tunah hian Mizoram chu India ram pumpuiah pathumna a ni a. Tunhnai maiah pawh thenawm state Manipur Chief Minister chuan thla ruk chhungin 100% literacy percentage ni turin tan an lak mek thu a sawi chu a tarlang a. Mizoram State Working Committee chuan ziak leh chhiar thiamlo te zirtirna hi zirtirtu (Animator) kutah a dah tawh a, chuvangin thahnemngai takin lo zirtir turin a chah a, puitling ziak leh chhiar thiamlo te pawhin tihtakzetna nen zir turin a fuih bawk a ni.

He Inkhawma thusawitu dang Pu H Zahmingliana, DAEO pawhin ziak leh chhiar thiamna chu hmasawnna tehna pawimawh tak a nih thu a sawi a. Literacy Drive hi Mizoramah District 3 - Mamit, Lunglei leh Lawngtlai-ah te neih mek a nih thu leh Lunglei District bikah chuan Western Belt-ah hian hmalak nasat a ngai bik a ni, a ti. National Sample Survey Record leh Census figure a in an loh thin avangin literacy percentage-ah pakhatna hial ni tawha kan inngaih laiin pathumna kan ni leh ta a, tunah hian Department of Education chuan nasa takin tan a la thar leh mek a, chumi tihlawhtilng tur chuan mi zawng zawngin mawhphurhna kan nei a ni, a ti bawk.

Phairuangkaiah hian ziak leh chhiar thiamlo thlanchhuah mi 98 an awm a, India Vision 2020-ah chuan kutdawh te pawhin Class XII an Passed ngei tawh tur a ni tih a ni a, ziak leh chhiar thiamna lamah nasa takin hmalak mek zel a ni. Phairuangkai VCP Pu Lalthanmawia chuan an khawchhungah Programme pawimawh tak neih a ni chu sawrkar leh Education Department chungah lawmthu a sawi a. Pu Kawlkunga Kawlni, Dy DPC in lawmthu sawiin inkhawm a khar a ni.