Mizoram Upa Pawl Headquarters Lunglei chuan vawiin khan Saikuti Hall, Venglai-ah General Assembly vawi 40-na an nei a, HPC Vice-Chairman Pu S.Laldingliana chu Khuallian niin Assembly hawnna inkhawm a hmanpui a ni.

MUP Lunglei Assembly hawnna inkhawm President Pu B. Lalchungnunga kaihhruaiah Khuallian Pu S.Laldingliana chuan ram hruaitu emaw kohhran leh khawtlang hruaitu emaw, Upa-te thurawn ngaichang thiam lo reng reng mite chu reiloteah an tlachhe thin a ni, a ti. MUP Hqrs. Lunglei Office chu cheithat a ngai tih a hriatpui thu sawiin Pu S.Laldingliana chuan MUP member-te hamthatna tur ngaihpawimawh dang an neih ang te chu rawn thehlut tur leh a rem chuan HPC Fund atanga sorkar kumthar 2014-2015 chhunga HPC Project-ah ruahmansak thei turin hma a lakpui tur thu a hrilh a ni. Vawiina MUP Assembly kalkhawmte zinga upa ber mipa leh hmeichhia - Pu Chawngruma, Venglai (Kum 90), Pi Zahliri, Bazar Veng (Kum 94) leh Pi Darringaii, Chanmari (Kum 94) - te hnenah Pu S.Laldingliana chuan Rs.1000/- theuh a pe a ni.

Vawiina MUP Lunglei Assembly rorel zingah Tar chawmna (Old Age Pension) hmu tura thlan hi MUP kuta dah ni se tih te, MUP member-te thliar bik awm lovin tar chawmna pek vek ni se, kum upa tawh chawmtu/enkawltu nei lote tan Old Age Home hi Lunglei-ah neih ve ni se, MUP Dan Bu ennawn leh Membership Fee tisan te, Member-te tan Rih Dil leh Lengui Airport tlawhna tur excursion huahawt ni se tih thu te a tel a ni. HPC Vice-Chairman Pu S.Laldingliana-in MUP Hqrs. Office, Lunglei-a hman tur Carromboard leh Draughtboard a pek avangin lawmthu an sawi bawk a ni. MUP Assembly Rorel Inkhawm hi Vice-President Pu Sanghlira Colbert-in a kaihruai a ni.

Mizoram Upa Pawl Headquarters Lunglei hnuaiah hian Unit 132 a awm a, Member a zavaiin 9529 (Mipa 4521, Hmeichhia 5008) an awm a ni. Member damlai zinga upa ber chu Pi Huatchuangi, Farm Veng (Kum 114) a ni. MUP Member nupa Inneih Golden/Diamond Jubilee thleng phakte chu Certificate leh Frame pek an ni thin a. Nikum Assembly an hman ni 6th March 2013 leh 5th March 2014 inkarah an member 321 an boral a, an chhungte hnenah Tuarpuina Citation pek vek a nih bakah vawiin Assembly hawnna inkhawmah an member boraltate Sunna hun hman a ni.