Ministry of Finance, Govt. of India-in NABARD kaltlanga Lunglei District Women Self-Help Group Project a kalpui mek hnuaiah vawiin khan Sub-Hqrs. YMA hall, Linglei-ah SHG members tan Training buatsaih a ni a, HPC Vice-Chairman Pu S.Laldingliana chu Khuallian niin Training a hawng.

Training hawnna inkhawm Pu Thanglunpaua Guite, Project Coordinator, World Vision India (Chhimtuipui ADP) kaihhruaiah Khuallian Pu S.Laldingliana chuan sorkarin mi harsa zawkte dinchhuah theih nan ruahmanna hrang hrang a siam thin chu a lawmawm hle rualin, sorkar atanga tanpuina dawngte chuan rinawmna leh tih tak zetna nena an bei ve loh chuan a hlawhtling thei lo a ni, a ti. He SHG Project thil tum pakhat “Sum khawla member-te tanpui” tih chu tarlangin Pu S.Dinga chuan Mizote hi inrenchem leh sum khawl thiam loh tak hnam kan ni a, hemi lamah chhungkaw tin ten tan lain sum khawl turin inzirtir kan ngai hle a ni, a ti bawk. Mizoram sorkar pawhin NLUP a kalpui mek a, beneficiaries ten tanpuina sum an hmuhin thildangah hmang mai lovin, an eizawnna tih ngelnghet nan hmang ngei se a duh thu a sawi a. Vawiina training-a kal SHG member-te chu rinawmna leh tihtakzetna nena he Project hnuaiah thawk turin a chah a, an eizawnna kawngah hlawhtling ngei turin duhsakna a hlan a ni. Khuallian Pu S.Laldingliana hi SHG ten an thil siam leh kutchhuak hrang hrang Mizo iptepui, bhujia leh bazar bag te an pe a ni.

Vawiina SHG Training-ah hian ‘SHG leh Eizawnna & Loan chungchang’ tih thupui hmangin Pu lalrokunga Chhakchhuak, District Development Manager, NABARD, Lunglei chuan zirtirna a pe a. Pu Lalduhawma, Chief Manager, MRB Lunglei chuan ‘Loan rulh dan chungchang leh rul thate tan bank atanga hamthatna awm theih dan’ thupui hmangin zirtirna a pe thung.

Lunglei District Women SHG Project hi World Vision India, Chhimtuipui Development Programme (ADP) chuan ni 29 November 2012 atangin Lungei District pumpuiah a kalp[ui tan a. Mizoram Rural bank (MRB) leh State Bank of India (SB)-te nen thawk hovin tunah hian kum 3-na a kal mek a ni. He Project hi India rama District hnufual bik thlanchhuah bikah kalpui niin a tum ber chu hmeichhiate chawikanna leh anmahni kaltlanga chhungkaw tina eizawnna siama retheihna umbo a ni.

Tun dinhmuna Lunglei District Women SHG Project hnuaia SHG with Saving Links (Bank-a Saving Account nei tawh) leh SHG with Credit Links (Bank atanga Loan la tawh) te chu a hnuai tarlan ang hi a ni :

RD Block - SHG with Saving Links - SHG with Credit Links

Lunglei - 465 - 71

Hnahthial - 179 - 16

Lungsen - 118 - 3

Bunghmun - 108 - 0

Total - 870 - 90

A chunga tarlan angin Women SHG 90-ten Mizoram Rural Bank kaltlangin zaa 7% leka pung awmin Loan lain eizawnna atan heng - ar vulh, vawk vulh, puantah, puanthui, sumdawnna (petty business), mombati siam, bhujia siam leh trade hrang hrang hmangin bul an tan mek tawh a ni.

Women Self Help Group (WSHG) Project hi Ministry of Finance, Govt. of India-in NABARD kaltlangin World Vision India, Chhimtuipui ADP ten kum 3 chhung enkawl turin Lunglei Leh Lawngtlai District-ah a thlang a. Hei bakah hian World Vision India chuan Ministry of Finance hnuaiah tho hian Self Help Promoting Institution (SHPI) Project pawh Saiha District-ah a kalpui mek bawk a ni.