HPC Lunglei sum cheng nuai 12 senga sak Pachi leh Ranchaw siamna tur Building Lunglei Hrangchalkawn AMFU rama a mi chu vawiin khan chu HPC Vice Chairman Pu S.Laldingliana'n a hawng.

Hawnna inkhawm hi Dr. Malsawmtluanga Fanchun BDO Lungleiin a kaihruaia, Pu S.Laldingliana chuan thu sawiin, Lungleiin HPC kan nei hi a vanneihthlak a, kan Chief Minister zahawm tak pawhin HPC hnathawh te chu tha a ti a ni a ti. HPC Lungleiin kan neih avang hian Dist dangte pawhin min thik thin a, chuvangin HPC kaltlanga hmasawnna hnathawh ah te hian mipuite pawhin lawmna chang kan hriat a pawimawh a ni a ti.

Pu Dinga chuan AMFU te hmalakna chu ropui a tih thu sawiin, kuthnathawktute an hmangaih hle a ni a ti a, AMFU hi IWMP ah Implementing Agency an ni a, BDO Lunglei kaltlangin hna tam tak an thawk tawh a ni a ti. HPC Vice Chairman hna a chelh atangin Lunglei khaw hming put chhan cheithat chu a ngaihpawimawh thu Pu Dinga chuan sawiin, tunah chuan cheithat a ni tawh a, hei bakah hian Nghahsih zauva lo neitu chhungkaw 25 te hman atan Power Supply pekluh a ni tawh bawk a ti. Hei bakah hian Kawmzawlah 33kv Sub Station chu cheng nuai 385 hmanga siam mek a nih thu leh zawhfel tep a nih thu a sawi a, Lunglei Pa ka nih angin Lunglei hmasawnna tur atan tute pawhin thurawn pe thin se a duh thu Pu Dinga hian a sawi bawk.

He huna thusawitu dang AMFU President Pu Joseph.Thanzuala chuan kuthnathawktu te ngaihsaktu sawrkar kan nei hi a vanneih thlak a, HPC Vice Chairman Kuthnathawktute harsatna hrethiam leh ngaihpawimawh sak thin tu kan nei pawh hi AMFU chuan lawmawm kan ti hle a ni a ti.

Vawiina hawn tak Pa chi leh ram chaw siamna in sakna hmun hi Pu Joseph H Thanzualan AMFU Lunglei te tana a pek niin Pa chi leh Ranchaw siamna khawlte chu AMFU Lunglei hian a nei sa tawh a, rei lote atangin AMFU Dist Hqrs. hmalakna hnuaiah hnathawh tan tum a ni.