Vawiin khan School Education Minister Pu H. Rohluna chuan “Working Conditions of Teachers in Mizoram” lehkhabu, School Education Department-in an Directorate Conference Hall-a tlangzarhna hun an buatsaihah khuallian niin hun a hmanpui. He lehkhabu hi NUEPA (National University of Educational Planning and Administration), New Delhi-in rampum huapa zirtirtute dinhmun zirchianna nei tura Project a ruahmanna hnuaia state 9 thlanchhuah zinga tel ve Mizoram–a zirtirtute dinhmun thlurbing na a ni.

Khuallian chuan India rama neih vawikhatna - zirtirtu hrang hrangte dinhmun zirchianna buatsaih a ni chu lawmawm a tih thu sawiin, zirna leh a hmasawnna atana hmalatu hrang hrang ten an hlawkpui phah ngei a beisei thu a sawi a ni.

NUEPA chuan he zirchianna atan hian Research partner leh Nodal Agency atan IASE chu ruat in, February ni 18, 2014 khan thawhhona thuthlung an lo ziak tawh a. September ni 1-3, 2014 chhunga NUEPA-in National Workshop a huaihawt khan State dangte nen sawiho a ni leh in, chumi a thurawn an pek te hmangin a tul ang te siamthat a nih hnuah March ni 20, 2015 khan National Workshop, New Delhi-a neih lehah State 9 zirchianna chu pawmfel a ni ta a. Mizoram State Study hi Prof. Vanlalhruaii, Principal, IASE chuan edit hna tul hma la chhovin, he lehkhabu hi peihfel a ni ta a ni.

Vawiin lehkhabu tlangzarhna hun hi Pu Lalthawmmawia, IAS, Director, School Education chuan kaihruaiin, Prof. Vanlalhruaii, Principal, IASE leh he lehkhabu editor ni bawk chuan he zirchianna in a thiltum sawina hun a nei a. Prof. Hom Chaudhuri, Research Team Leader chuan Mizoram zirtirtute dinhmun zirchianna atanga an thil hmuh tlangpui leh, hmasawnna awm theih nana hmabak te tarlangin, Pi Zochhuani, Research Team member chuan commendation a chhiarchhuak bawk.