HPC (D) helpawl hnarkaitu bul ber pakhat H.Zosangbera chu nimin tlai dar 6.30 vel khan Delhi-ah Mizoram Police leh Delhi Police tangkawp ten an man a. Vawiin khan Aizawl thlenpui niin thu zawhfiah turin Police kutah dah mek a ni.

H.Zosangbera man chungchangah thil awmdan chu Home Minister Pu R.Lalzirliana chuan vawiin khan a sawifiah a. Home Minister chuan sorkarna an chelh tirh lai kha chuan HPC (D) te hi helpawl anga an enloh thu sawiin a hnuah erawh chuan pawl pahnih ah inthenin pawl pakhat zawk H. Zosangbera pawl te chu Mizoram chhunga remna leh muanna tibahlah zawngin an chimawm ta hle a. Sorkar leh mipui pawikhawih zawnga chet an chhunzawm tak reng avangin an hruaitu zinga pahnih Army Chief Lalropuia leh Deputy Army Chief Biaknunga te chu engemawti lai khan man an ni, a ti a. Heng an hruaitute chhuah lehna tur hian Chief Minister hnenah dilna nilovin thudelhkilh engmah awmlova chhuah phutna an thlen a. Hei hi sorkar chuan ngun taka a ngaihtuah hnuin an tihtur leh tihloh tur an zawm hunah ngaihtuahsak theih an nih tur thu MHIP Day, Keifangah a sawi chu sawi nawnin Home Minister chuan heti chung hian zawm duh lohvin pawi khawih tura vauna an tichhuak leh ta zawk a ni, a ti a. Mizoram chakkhai lakluhna pui ber Bairabi Rel kawng Bomb chhiat te, Bagha leh Vairengte inkara buaina siam te, Aizawla Bomb tihpuah emaw buaina siam te an tum bawk a, chu bakah Tuikuk hel pawl lamtangah siamin Mizoram chhunga remna leh muanna tibahlah zawnga chetlak an tum leh zel tih pawh sorkarin a hria a. Heng zawng zawnga mawhphurtu leh hnarkaitu ber nia hriat H.Zosangbera chu Delhi Police te puihnain Mizoram Police te chuan an man ta a ni, a ti.

Pu R. Lalzirliana chuan H.Zosangbera hi Mizoram Police Station hrang hrangah thubuai 32 zet nei mek nia hriat a nih thu leh tunah hian thubuai dang Aizawl Police Station Case No. 322/ 12 Under Sectio 121A/ 34 IPC awrhtirin thu zawhfiah tura kawl mek a ni, a ti.

Rambuai thawpikthlakzia sawichhuakin Home Minister chuan Hmar unau te thlavang hauh pawh hi sorkar chuan tul a ti takzet a. Remna leh muanna duhtu mipui te humhalh tur pawhin Mizoram Police in Flag March an buatsaih dan leh an chungah rinna a nghah thu a tarlang a. Fapa tlanbo chungchang tehkhin thua hmangin heng helpawl mi leh sa te pawh hi inlamleta an lo kir leh phawt chuan englai pawhin sorkar chuan pa ber chan changa lo dawnsawn leh tuamhlawm a inpeih reng a ni, a ti.