Mizoram Sawrkar leh Hmar People's Convention (Democratic) ten 2.4.2018-a inremna, Memorandum of Settlement an lo ziah tawh angin vawiin khan Central Training Institute (CTI), Sesawng-ah HPC(D) Cadre ten an ralthuamte tungin, khua leh tui tha ni tura intiamna thu an sawi a ni. He hun hi Chief Minister Pu Lal Thanhawla leh Home Minister bakah Minister leh MLA engemawzahin an telpui a, Manipur atangin MLA Pu Chaltonlien Amo a lo kal bawk a ni.

"Arms Laying Ceremony" ah hian HPC(D) Armed Cadre 102 lo kir te hian an ralthuam chi hrang hrang, silai 44 leh a mu 2892 bakah Weapon Magazine 48 leh Radio Set 5 te chu Home Minister Pu R. Lalzirliana hnenah an hlan a. (Home Minister hi Pu Balaji Srivatava, DGP leh Pu Lalbiakthanga Khiangte, DIG NR ten an tawiawm a ni.) Mizoram Sawrkar chuan heng HPC(D) Armed Cadre ten an ralthuam an tun tak avangin an silai man hu Rs. 7,14,005 chu Home Minister hian a hlan nghal a. HPC(D) personnel 114 (Council Member 12 leh Armed Cadre 102) te tan nunphung pangngai zawm leh tura an lo intundin theih nan rehabilitation package Rs. 3.42 vaibelchhia Chief Minister-in a hlan nghal bawk. Heng lawmman leh tanpuina te hi HPC(D) aiawhin an Working Chairman Pu L.T. Hmar chuan a dawng a. A ni hian Chief Minister, Home Minister, Pol. Adviser to CM Pu Lalrinmawia Ralte, Mizoram Law Commission Chairman Pu John Siamkunga MLA, Chief Secretary Pu Arvind Ray te bakah inremna nei tura Mizoram Sawrkar aiawh a Home Department palaite hnenah Thangchhuah Puan a hlan bawk a ni.

Chief Minister Pu Lal Thanhawla chuan thu sawiin, inremna nei tura hma latu Home Department leh HPC(D) te chungah lawmthu sawiin, "remna kawng dap a inbiakna te neia hun engemawchen hman a nih hnu in inremna ziah ni a, vawiin hun kan thleng ta chu a lawmawm takzet a ni," a ti a. Tih tak takna nen an ralthuam tha te an rawn hlan chuan muanna an duh tak meuh a lantir thu leh, neitu rilru pu a khua leh tui tha ni turin HPC(D) te chu a sawm a. Ramin hma a sawn a changkang lam a pan dawn chuan remna leh muanna a pawimawh hmasak thu sawiin, nunphung pangngai zawh leh a, chenpuite nen inlungrual taka chengza tura rammu thin te chu society-ah lo let leh an nih avangin ram leilung fate hmasawnna leh hmasawn lohna ah pawh midangte nen an mawhphurhna a inan vek tawh thu a sawi a. Theih ang tawpa hma lak tlan vek chuan hmasawnna tluang takin a kal thei dawn a ni, a ti. Chief Minister chuan inthliarna chu insuihtetna a nih thu sawiin, "Zofate chu kan tawng leh kan sakhuain min thlungkhawm a, a chi ang zawnga inthliar mai lovin, kan inunauna kan hriat reng a, kan tan ho phawt chuan kan chhehvela hnam dangten min ngaisangin min zah ang," tiin HPC(D) te leh vawiin mipui kalkhawmte chu muanna vawng zel turin a sawm a. Zohnahthlakte chu khawi rama cheng pawh ni ila, kan behna sawrkar theuhte lakah rinawm takin kan awm tur a ni, a ti. Chief Minister chuan Sinlung Hills Council huamchhunga chengte mamawh pawh Sawrkarin a hriatpui thu leh, a pawimawh hmasak dan and zela hma lak sak a nih tur thu a sawi bawk. 

Home Minister Pu R. Lalzirliana chuan mipuiin remna leh muanna an duhna ngaipawimawh a, ram hmasawnna atan an ralthuamte an tung tak avangin HPC(D) te chungah lawmthu a sawi a. Silai nilovin pentui hmanga ram development a pawimawh zia pawma an rawn kir ta chu a lawmawm hle a ni, tiin khua leh tui tha ni tura rinawmna thutiam an sawi tak chu vawng nung reng a, inlungrual taka hmasawnna kawng zawh tan a ni tur chu lawmawm a tih thu a sawi.

Manipur MLA Pu Chaltonlien Amo pawhin thu sawiin, vawiin chu hun ropui leh chhinchhiahtlak tak a ni, a ti a. HPC(D) te nen inremna kawng Mizoram Sawrkarin a hawng chu lawmawm a tih thu sawiin, he inremna hian muanna tluantling zawk a thlen a duhsakna a hlan bawk a ni.

Vawiin HPC(D) te lawmna inkhawm, Home Coming Ceremony-ah hian Pu Lalrinliana Fanai, Commissioner & Secretary, Home Department chuan kalkhawmte lawmna thu sawiin, Pu Lalbiakzama, Additional Secretary, Home chuan inremna nei thei tura hmalak a lo nih tawh dan report pe in, Pu L.T. Hmar, Working Chairman, HPC(D) hnen atangin thusawi ngaihthlak a ni bawk a. Pu Lalrinmawia Ralte, Political Adviser to CM chuan lawmthu sawiin hun a khar a ni. 

Mizoram Sawrkar leh HPC(D) ten inremna nei tur hian 11.11.2010 khan State Guest House, Aizawlah inbiakna an nei a. Hemi hnu hian Mizoram Sawrkar leh HPC(D) aiawh palaite hian vawi kua (31.1.2013, 18.7.2013, 14.8.2013, 10.8.2016, 5-6.10.2016, 16.12.2016, 28.4.2017, 21-22.9.2017 leh 7-8.3.2018) neih leh niin, April ni 2, 2018 khan State Guest House, Aizawlah inremna thuthlung ziah a ni ta a ni. Mizoram Sawrkar chuan HPC(D) cadre rawn let lehte hi The Mizoram Insurgent Surrender and Rehabilitation Policy, 2017 hmangin chhawmdawlna a pe a ni.

Vawiina HPC(D) ten silai leh a mu (firearms leh ammunitions) an tun tak te chu hengte hi an ni: Sniper Rifle SRS A1 - 4, Self Loading Rifle - 1, AK Series Rifle - 9, Colt M4 Carbine - 1, Colt M16  Carbine - 1 leh Heckler & Koch Series-  6, DBBL - 1, Shot Gun - 1, M79 Grenade Launcher - 1, 9mm Pistol - 3, Baretta 9mm Pistol - 1 leh .32 Pistol - 3, Grenade - 5, M79 Grenade Launcher Shells - 10, Assault Rifle Ammunition - 2654, DBBL ammunition - 127, 9mm & .32 ammunition - 89, Detonator - 7, Weapon Magazine - 48 leh Radio Set - 5 te a ni.