Vawiin khan Mizoram Chief Minister Pu Lal Thanhawla chuan 3rd MAP Campus, Mualpui hmunah ‘Tata Trusts Centre of Excellence for Sports’ a hawng a; a bultan nan he CoE-ah hian naupang thlan bikte tan Football zirna kalpui a ni dawn. Mizorama a hmasa ber he ‘Centre of Excellence for Sports (Football)’ hi Tata Trusts bultum niin Mizoram Sorkar bakah North East Initiative Development Agency (NEIDA), Mizoram Football Association (MFA), Aizawl Diocese Education Society (ADES) leh Mizoram Police te nen an thawkho dawn a ni.

Tata Trusts Centre of Excellence hawnna inkhawmah Khuallian Mizoram Chief Minister chuan mimal leh Mizo mipui zawng zawngte aiawhin Tata Trusts leh an thawhpuite chungah lawmthu a sawi a. He CoE changtlung tak hi Mizoram tan chauh ni lovin North East state dangte tan pawha hman tangkai tur a ni tiin he hmunah hian sports lama naupang talent tha tak tak neite an lehkha zir lamah bahlah miah lova an sports discipline-a siam puitlin a ni ang a, anmahni state theuhte bakah rampum tihmingthatu an nih ngei a beisei thu a sawi. 3rd MAP, Mualpui-a CoE hmun hi kum 2 chhung hman tura tih ni mahse a hnenah an dil angin kum 5 atan hman a phalsak nghal bawk a ni. Badminton lamah pawh Mizote hian talent tha tak kan nei tih hriain Sakawrhmuituai Tlang hmunah ‘High Altitude Badminton Institute’ pawh sak a nih thuai tur thu Chief Minister hian a sawi bawk.

MFA President Pu Lal Thanzara pawhin thu sawiin Mizoramah hian Footbal zirna tur hmun changtlung tak mamawhna chu Tata Trusts kaltlangin vawiinah tihpuitlin a ni ta chu a lawmawm takzet a ni, a ti a. He hmuna zir thei turin Mizo naupang leh thalaiten  theihtawpa bei turin a chah a, mahni inthununna leh thawhrimna nen he hmunah hian a tam thei ang ber lut turin mahni theuh inbuatsaih turin Mizo naupang/thalaite a chah.

Tata Trusts Centre of Excellence (CoE) for Football, Aizawl-a zir tur Batch hmasa berah naupang kum 12-14 inkar mi 25 thlanchhuah an ni a, anni zinga 16 chu Mizoram hmun hrang hrang atangin thlanchhuah an ni a, Manipur atangin 4, Assam (Bodoland) atangin 4 leh Nagaland atangin 1 an ni. Hmarchhak biala thalaiten football-ah talent an nei thatzia hriain Tata Trusts te chuan he CoE hi a hmasa ber atan Aizawl-ah an rawn hawng a. Hei bakah hian Badminton lama talent neite chherchhuahna turin chak takin hma an la mek bawk a ni.