Nizan khan Pu John Rotluangliana, Minister, FCS&CA, Tourism, Transport chuan a bial chhung Rajivnagar khua-a Chakma-te Kut Bizu Festival chu hawnna neiin khuallian niin a hmanpui.
Minister chuan Bizu Festival hmangtu zawng zawngte chibai bukin a bik takin Bizu Organised-tu Young Chakma Association chungah lawmthu a sawi a. Chakma hnamte'n hnam anga Festival an hmang thei chu lawmawm a tiin chhunzawm zel tur pawhin a chah a. Vanneih thil thu-a nakum Bizu Festival khuallian ni-a hmanpui theitu a ni a nih chuan Bizu Festival hman nan ama Pocket atangin Cheng Nuai 10 a pek tur thu a sawi a ni.
Pu Lalhmansanga, Deputy Director, Tourism Department pawhin thu sawiin Tourism Home Stay kalpui mekah Tuipuibari, Rajivnagar I & II, Damparengpui, Dampa Zodin leh Hruaitluang khuate thlan an nih thu sawiin tuna Bizu Festival hmang mikhualte tha taka an lo dawnsawn ang hian Tourist chi hrang hrang lo thlen hunah pawh lo dawngsawng turin a chah a. Hlawhtling leh hlim taka an Kut ropui Bizu Festival chu hmang vek turin a chah bawk.
Bizu Miloni Chakma Festival hi 13th - 15th April thleng awh tur a ni a. Chakma hnam tana Kut ropui tak niin an hnam ziarang pholanna hun tha tak hman a ni. Chakma hnam pawhin ngaipawimawhin Bizu  Festival hi kumtin hman thin a ni a. Kumin hi Mamit District chhunga Chakma hnamte'n tum 5 an hmanna a ni. Bizu hmang tur hian khaw hrang hrang atangin mipui an fuankhawm a. Zai leh lamin hun an hmang a ni.
Nimin vek khan Khantlang khua tlawhin khawtlang hruaitute nen inkawmhona hun an hmang a. Khantlang Community Hall  Approach road Border Area Development Programme (BADP) hnuaia siam mek pawh a hmunah a tlawh a ni. Rajivnagar khua-a Tourism Department hnuaia Tourist Lodge leh Staff Quarters, Cheng Nuai 86 senga sak mek chu a hmunah a tlawh a. Tourist Lodge hi Lushai Engineers- te sak niin Mizo pa chhiara chhawng thuma sak tur a ni. Kumin July thla a peihfel tura ruahman a ni bawk.
Minister hian PHE Department hmalakna Public Hydrant ( Public point), Multi Sectoral Development Programme (MSDP) hnuaia Cheng Nuai 90 senga siam mek pawh a hmunah a tlawh a. MSDP hnuaiah hian Rajivnagar khaw chhung tan Public Hydrant (public point) hmun 10 -ah siam niin, Tanky lian Litres Nuai 1 dawng pahnih siam tura ruahman a ni a. Distribution Line Network Km 1.5 leh Intake Gravity Km 8 siam tura ruahman a ni bawk.
Bizu Festival-ah hian Mamit District chhunga Chakma khua hrang hrang, Rajivnagar I&II bakah Khantlang, Andermanik, Belkhai khuate atangin mipui thahnem tak an fuankhawm a ni.

Attachment

  • Loading attachment...