3758/2022-2023

Shillong, 4th March, 2023 : Nimin (Zirtawpni) tlai dar 4:30 khan Human Resource Development (HRD) Board Vice Chairman Dr L.Thangmawia, MLA chuan Shillong-a North Eastern Indira Gandhi Regional Institute of Health & Medical Sciences (NEIGRIHMS) a tlawh a, MLA hi Pu Ricky Zobiakvela, President, Shillong Group YMA chuan tawiawmin Dr C.Daniala, NEIGRIHMS Medical Superintendent chuan a lo dawngsawng a ni. 

Dr Thangmawia chuan NEIGRIHMS Director Dr Nalin Mehta pawh a office-ah kawmin NEIGRIHMS-in Mizo damlo tamtak a lo enkawl tawhna leh damlo te tana an thawhrimna avangin lawmthu a hrilh a. Mizo damlo te zingah tawng lama harsatna nei an awm thin thu leh chutiang a ni chung pawha harsatna lian tham awm lo va NEIGRIHMS pantute tana theihtawp an lo chhuah thinna pawh rawngbawlna ropui tak a nih thu a hrilh a. Dr Nalin Mehta chuan an tih tur an ti mai a ni a, lawmthu sawina tur hranpa a awm loh thu sawiin tawng lama harsatna neite pawh Mizo tlangval, damlo mi te leh milian pawh ang khata en thin, Medical Superintendent Dr. C. Daniala a awm bakah Mizo Doctor, Nurse leh Doctor zirlai engemawzat an awm avangin an ni tlawmngaihna zarah harsatna lian tham awm lovin an lo enkawl theih zel rih thu a lo hrilh a, chutih rual erawh chuan tuna Mizo thawktu leh zirlai te atanga in volunteer thei a lo zawn tur thu leh Mizorama atanga damlo kalten harsatna an neih loh nan theihtawp chhuah a nih zel tur thu MLA hi a lo hrilh a ni.


NEIGRIHMS Director Dr Nalin Mehta chuan Mizo tlangval Dr Ramdinthara Sailo chu JIPMER-ah a classmate a nih thin thu leh mi bik, talent nei tha, zaithiam, hla phuahthiam, Football thiam, painter(artist) a nih thute a lo sawi a, Doctor thiam tak a nih mai piah lamah line hrang hrangah professional nih tling ni a a hriat thu MLA  hi a lo hrilh a, MLA chuan Dr Ramdinthara Sailo chu ringtu tha, hla phuah thiam, a hla phuah chu Zoram kristian ten an sak lar a nih thu leh a Doctor hna thawhlai tha tak kalsan a Kristian Missionary-a a kal tak thu Director hi a hrilh bawk.


Dr. Thangmawia chuan NEIGRIHMS Director hnenah hian Mizo damlo an admit dan statistics a dil a, Mizo damlo an enkawl tam dan a zira Mizoram sawrkar thuneitu sangte hnena ruahmanna thar siam tura thlen a tum thu a hrilh a, NEIGRIHMS Director chuan a Mizo damlo NEIGRIHMS in an lo admit dan statistics kimchang MLA hnenah hian hun remchang hmasaa pe turin a mawhphurtute a hrilh nghal a ni.

Medical Superintendent Dr. C.Daniala chuan MLA leh a tawiawmtute hi NEIGRIHMS hmunhma hrang hrangte fankual puiin hmalakna kal mekte a hrilhfiah a, Cancer enkawlna tur bik pawh peihfel a nih tawh thu leh hun remchang hmasaah hawn a nih tur thu leh  Operation Theatre(OT) siam thar 8-te pawh enpuiin damlo admit ten awm man leh chaw a thlawna an dawn dan te, damdawi chi hrang hrang MRP aia tlawma damlo ten an lei theihnana NEIGRIHMS thuneitute hmalak dante a hrilhfiah bawk. MLA hian Mizo Doctor, Nurse leh Doctor zirmek ten Mizo tlawmngaihna avanga an hna baka damlote an lo buaipui thin naah Mizoram sawrkar aiawhin lawmthu a sawi a, an thawhrimna leh inpekna avanga damlo NEIGRIHMS pantute an lawm thin zia a hrilh bawk.

NEIGRIHMS hi kum 1987-a din, AIIMS, Delhi  leh  PGIMER, Chandigarh te anga Doctor Specialist thleng zir theih nana din a ni a. India hmarchhaka hetiang zir theihna hmasa ber niin Sawrkara laipui, Ministry of Health & Family Welfare hnuaia India rama din pathumna a ni bawk a ni.

Attachment

  • Loading attachment...