16/2022-2023
Aizawl the 11th April, 2022 : Vawiin khan Human Resource Development Board, Vice Chairman, Pu L. Thangmawia chuan NABARD sum Rs. 7.5 lakhs leh MLA Fund Rs. 7.5 lakhs tangkawp hmanga Govt. Primary School Pawlrang sak thar a hawng a. He hunah hian Lengteng bial MLA scheme thar, kum 2025 December thla ral hmaa Lengteng bialchhung in tinin rangva inchung an neih vekna tur  'Hlunsanga Malsawmna Scheme' tih chu a puang nghal bawk.

Lengteng bialtu MLA ni bawk, Pu L. Thangmawia chuan Govt. P/S Pawlrang Building hawn thar chu cheng nuaih 15 a sakah chuan Mizoram pumah a țha ber a nih a rin thu a sawi. Pu Thangmawia chuan hlawkna um miah lo a he Building satu Pu Biakthansanga, Pawlrang VCP hnenah lawmthu sawiin hun rei tak ațanga Pawlrang khuain School Complex neih leh infiamna tur field țha neih an lo suangtuah țhin chu a takin a lo thleng dawn ta hi a lawmpui thu a sawi a, Zirtirtu leh zirlaite hnenah sikul thar lawmpui nan Computer leh Printer set 1 a pe nghal bawk.

Pawlrang khua chu MLA Model Village atan a lo thlan tawh angin khawtlangin an ngaih pawimawh hrang hrangte chu hrileng karah a theih ang anga a bawhzui sak țhin thu a sawi a. Field puitling țha tak laihna tur pawh hi a dil angin Chief Minister Pu Zoramthanga'n a pek thu leh tunah laih tan a lo ni ta chu Pawlrang khua țhalaite leh infiam mite a lawmpui thu a sawi bawk.

Pu Thangmawia chuan Model Village nih hi sum leh pai leh hmasawnna luh thur thurna tur lam ni lovin, hmasawnna ruhrel leh vantlang thil an neihsate enkawl țhat kawngah leh rilru lama changkanna tur lam hawi zawng a nih zawk thu sawiin, faina leh thianghlimna kawngah te, hriselna kawngah te, zirna kawngah te Lengteng bial khaw dangte mai bakah Mizoram khaw dangte entawn tlak ni tura țan lakna tur a ni zawk a ni a ti. Chuti ang tak chuan changkanna te hi sum leh pai a teh lovin hetiang kawnga teh hi a hun tawh hle a ni a ti bawk.

HRD Board Vice Chairman Pu L. Thangmawia chuan he hunah hian Lengteng bial ațanga Mizoram Independent puan laia hming ziaktu (signatories) te zing ami Pu Hlunsanga, Kawlkulh khua hming chawia MLA Scheme thar 'Hlunsanga Malsawmna Scheme' chu puang nghalin he Scheme hnuaiah hian Lengteng bial chhunga rangva in chung la nei lo zawng zawngte bakah rangva in chung nei tawh, a thir a chhiat avanga a țhenlai emaw, a vai emawa thlak ngai zawng zawngte kum 2025 December thla ral hmaa thlak sak vekna tur Scheme a nih thu a sawi a. He Scheme hi 2023 January thla ațanga țan tur a nih thu leh 2023 chhungin a tlem berah inchung 200 thlak a ni dawn a ni a ti. He Scheme hlawhtlin nan hian MLA Fund bakah Mizoram Sawrkar Department bakah Corporate Social Responsibilities (CSR) ațang te pawhin sum beisei a ni ang a, Ngopa BDO leh Khawzawl BDO te kaihhruaina hnuaiah a țul angin Committee din chhoh a ni dawn a ni a ti bawk.

Sikul hawnna inkhawm hi Pawlrang VCP Pu Biakthansangan a kaihruai a. MLA hi Pu JR Lalhruaitluanga, DEO Saitual leh Pu VL Malsawma Dy. State Project Director, Samagra Shiksha ten an țawiawm a ni.