1814/2022-2023  
Aizawl 5th September 2022: Vawiin khan Education Department, Mizoram University buatsaih, Teachers’ Day puala Seminar chu Pu L.Thangmawia, Vice Chairman, HRD Board chuan a telpui a. Mizoram-a Education lo thanchhoh dan te, Science leh Mathematics zirna lo thanchhoh dante sawi ho a ni.

Pu Thangmawia chuan Teachers’Day, 2022 pualin Mizoram chhunga a zirtirtu zawng zawngte chibai a buk thu a sawi a. Mizoram University-a Education Department-in hun tha tak an siamsak avanga lawmthu a sawi a. Mizoram University chuan subject hrang hrang kaihhnawiha research tha tak tak a kalpui mek piah lamah, University awmna state Mizoram tana research finding chhen fakawm leh hman tangkai nghal mai theih tam zawk hmuchhuak tura tan a lak zel a tul thu te, chu chu University mawhphurhna a bet tel tlat a ni a ti. Thil tha leh ropui tam tak hmuchhuak mah ila, Mizoram tana tangkai tur research a tam loh chuan Mizoram chhunga University kan neih hi Zoram tana thawktute leh Zoram mipui te tan kan University chhuanvawr hian a nihna tak a phawkchhuak kim thei lo a ni a ti.

Pu Thangmawia chuan Science leh Mathematics hi zirtirtu kan neih that loh rei avangin kan rual u zawk ten subject har leh Mizote thiam theih lohah an ngai thin a. Mahse chu chu hun in her zel hian rawn ti danglamin tunah chuan India ram mai ni lo, khawvel huap pawha lang tham Science leh mathematics-ah zofate kan awm nual tawh a ni tiin Mizo zirlaite thluak hian hnam dangte ang bawkin heng subject thiam tur hian a tlin a ni a ti a. Hnam dangte zir ang tluka zir tura tumruhna leh taihmakna kan neih hi a pawimawh ber zawk a ni a ti.

Mizoram University Education Department chuan Science leh Mathematics zirna kawnga hma kan lo sawn zawkna tur te, pianphunga rualban lo ten zirna tha zawk an neih theihnan research kaltlanga Mizoram sawrkar hnena rawtna awmze nei tam zawk finchhuah zel turin a sawm bawk.

He Seminar hi Prof. H. Malsawmi, Head, Department of Education, Mizoram University in a kaihruai a, Dr. R. Zothanliana, Assistant Professor, Department of Education, Mizoram University in lawmthu sawiin hun a khar a ni. He mi hnu hian zirlaite leh zirtirtu ten Teachers’Day pualin hun an hman chhunzawm nghal bawk a ni.