2332/2022-2023 
Aizawl the 15th October, 2022 : Vawiin khan HRD Board Vice Chairman Pu L. Thangmawia chuan Naga Students’ Union Mizoram (NSUM) ten Art & Cultural Auditorium, Beraw tlang, Aizawla an buatsaih '24th Freshers Meet cum Cultural Day' chu a hmanpui.

Khuallian Pu L. Thangmawia chuan Mizorama Naga zirlaite chu duhsakna hlanin zirna chhunzawm nana Mizoram an rawn pan avangin lawmthu a hrilh a, harsatna an tawh apiangah Mizoram sawrkar chu anmahni tanpui turin a inhawng reng a ni a ti. Hlawhtlinna duhawm tak nena Mizoram atanga an rama an kir leh ngei theih nan duhsakna a hlan bawk.

Pu Thangmawia chuan he huna an thupui 'Toward Identity & Empowerment' chu tunlai huna zirlaite leh thalaite tana thil pawimawh berte zinga mi a ni a ti a. Mahni nihna leh hnama chiangte reng reng chu lehkha an thiam san poh leh mipui vantlang tan an tangkai a, ram leh hnam tana thawk an ni tih an hriat avangin eirukna leh hlemhletnaah an fihlim a, tlawmngaihna nen mipuite tan an mawhphurhna neihsa piah lamah an thawk fo thin a ni a ti. Lehkhathiam, mahni identity hre lote chu an thiamna a san zawh poh leh ram tana an hnawksakna a tam ting mai a ni tiin hnama chiang lote chuan ram leh hnam tana thawh tul tihna an nei  lova, anmahni chhungkua leh chhungkhat lainate tan an thawk mai thin a ni a ti.

Pu Thangmawia chuan mahni leh mahni thil tha ti thei tura intihchak (self empowerment) a pawimawh hle tawh a ni a ti a. Chung mite chu tute emaw fak leh sel avangin an nghing ve ngai lo va, sawrkar tan leh vantlang tan loh theih loha hman tangkai ngaiin an awmphah zawk thin a ni a ti. Zirlai nih lai atanga harsatna hmachhawn tura mahni intuaihriam a, harsatna tawh a len zawh poh leh hnehna hlado a ropui ang a, hringnun chanchin ngaihnawm tak an siam phah zawk dawn a ni tiin a fuih. Mahni tan chauh ni lo va midangte tana thawh duhna rilru hian mitinte chakna thar leh hlimna a pe fo thin a ni a ti.

NSUM-ah hian zirlai 189 member awm mekin Mizorama zirna in hrang hrang - AICS, ATC, COH, MZU, NIELIT, RIPANS, CVS&AH leh ZMC a zirlaite an ni a. Kumin 2022 June ni 4-hi an din champha kum 25-na(Silver Jubilee) a ni.

He programme hi Pi Eli Neihoikim Doungel-in kaihruaiin Rev. Lungjingam Pamei chuan hunserh a hmang a, Pu Eno Takalong Kichu, President, NSUM chuan inlawmna thu sawiin Pu Eli Alokali chuan malsawm tawngtainain hun a khar a ni.