2331/2022-2023
Lunglei the 14th October,2022 - Lunglei DC Office kum 50 tlin lawmna(Golden Jubilee) programme chu vawiin khan Convention Centre- ah ropui tak hman a ni a. Agriculture Department etc changtu Hon'ble Minister Pu C. Lalrinsanga chuan a hmanpui a ni.

He hunah hian Lunglei HPC Vice Chairman Pu Lawmawma Tochhawng, Lunglei DC Office- a thawktu leh pensioner-te, Lunglei District head of office-te leh sawm bik dangte an tel a ni.

Khuallian in Lunglei DC Office Complex ah Jubilee Monument a tlangzarh hnu ah Convention Centre Lungleiah lawmna inkhawm neih a ni.

Pu C. Lalrinsanga chuan kalkhawmte Golden Jubilee chibai bukin he mellung pawimawh tak hian DC office thawktute chu phur tharna leh thahnemngaihna thar a pek ngei a beisei thu a sawi a. DC Office chu Disrict inrelbawlnaa pisa pawimawh ber leh District hmasawnna tura mawhphurna sang tak nei anih angin thawktute chu mipui rawngbawltu pawimawh tak an ni tih hre thar turin a fuih bawk a ni.

He hunah hian Lunglei HPC Vice Chairman Pu Lawmawma Tochhawng leh Lunglei DC Pu Kulothungan A te pawhin thu an sawi a ni.

Lawmna inkhawm hi Lunglei Additional DC Pu Donny Lalruatsanga'n kaihruaiin Rev R. Lalbiakliana, General Secretary, BCM in hunserh a hmang a, Pu Benjamin Rosangkima, Secretary, DC Office Welfare Committee in report a pe a ni. DC Office thawktuten special item hrang hrang an entirin Pi Lalenkawli Pautu in kalkhawmte zaiin a awi bawk a ni.