No.2788/2021-2022
Aizawl, 29th October, 2021 : Vawiin khan Human Resources Development Board Vice Chairman, Lengteng Bialtu MLA ni bawk, Pu L.Thangmawia chuan a bial chhung Kawlkulh khuaa mi, Regional Skill Competition ni 20-23, October, 2021 Patna, Bihar-a neiha Gold Medal latu Samuel Lallawmzuala S/o Zosangliana, Kawlkulh chu Lawmpuina Rs. 30,000 a hlan a. Hemi rual hian laptop, computer leh chhiat tawha hman tur hruizen a sem nghal bawk.

Lawmpuina hun tawite a office chamber-a neihah thusawiin Pu L.Thangmawia chuan a bialchhung Kawlkulh khua atanga India rampum huapa Skill Competition-a tel thei tura paltlang ngai tam tak pal tlang thei Samuel Lallawmzuala chu chhuanawm a tih thu leh a lawmpui thu a sawi a. World Level Competition-a a tel phak ngei theih nan intihsiakna pakhat paltlang a la hmabak pawh a paltlang ngei theih nan duhsakna a hlan a, a hlawhtlin tawhna lawmpui nan leh a la hmabak inelnaa a inbuatsaih nan Rs. 30,000 a hlan a ni.

India Skills Regional Competition-a Gold latu Samuel Lallawmzuala hi Pachhunga University College-a I Semester (Philosophy) zir mek lai niin World Skill Competition 2022, Shanghai, China-a tel tur thlanna stage 3 paltlang turah Stage hnih - State Level leh Regional Level-ah Gold Medal a la ve ve a. December, 2021-ah National Level inelna a hmachhawn leh ang a, heta a tlin leh chuan China rama khawvel huap inelnaah India ram aiawhin a tel thei dawn a ni.

HRDB Vice Chairman Pu L.Thangmawia chuan hun harsa Zoram leh khawvelin Covid hripui avanga a hmachhawn mek lai hian zirna pawhin a tuar nasa hle tih sawiin a bialchhung zirlaite chu he programme kaltlang hian zirna lam bahlah lova theihtawp chhuah zel tura chahin zirlai tumruh, harsatna neite tan an harsatnate a hnenah thlen thin turin a ngen a, a tih theih chinah theihtawp a lo chhuahpui zel tur thu a sawi bawk.

He hunah hian MLA hian Awmpui chanchinbu, Kawlkulh leh Govt. Primary School I, NE Khawdungsei te tan Computer leh Printer set, B.Com zirlai Malsawmi D/o Thanghmingliana, Ngopa hnenah Laptop a pe a. Teikhang khua leh Zoram Drivers Union, Pawlrang te tan motor accident palha hnuhchhuahna tur hruizen lian a pe bawk.