4320/2025-2026

Dated Serchhip, the 6th February, 2026: Ministry of Jal Shakti, Department of Drinking Water & Sanitation-in India ram hmun hrang hranga Jal Arpan Diwas (Tui inhlan chhawnna ni) hmang tura a beisei angin nimin khan Serchhip District a Hriangtlang Community Hall ah he hun hi hman a ni a, Er. Isaac Lalchhuanmawia, Sr.EE PHED chuan khuallian niin a hmanpui.

Khuallian chuan thu sawiin he hun hman a nih chhante a sawifiah a, JJM scheme kaltlanga tui lak chu khawtlang kutah hlan a lo nih tawh dan te a sawi a, Central sawrkarin Jal Arpan Diwas a rawn ruahman takah chuan he hun hi official taka khawtlang kuta hlanna nia pawm tur a nih thu a sawi.

Sawrkar chuan tui hnianghnar zawk kan neih theih nan a tih theih nasa taka hma lak tawh thu sawiin heng kan tui lakna hnar lo humhalh leh tui hnianghnar zawka kan neih zelna tura enkawl hna thawh chu mipuite kut a nih tawh dawn thu a sawi a, neitu an nih inhria a, thahnemngaihna rilru an put zel a pawimawh a ni, a ti bawk. Tui lak enkawlna kawnga hma latu ber WATSAN Committee-in ruahmanna an siamte mipuiin tha taka lo zawm a, tui fee pe tha turin a sawm a, harsatna an tawk a nih chuan Department in theihtawp an chhuah zel tur thu a sawi a ni.

Jal Sankalp (Water pledge) Tui vawng thianghlim tur leh humhalh tura thutiam lakna hun hman zui niin, Pi PC Lianremgpui, JE hoin FTK trained person (Five Women) ten tui test dan a takin an entir bawk.

Hriangtlang VCP Pu Remlalruata chuan JJM Scheme leh PHE Department thawktute leh hotute zarah Hriangtlang khuain tui an hnianghnar thu a sawi a, an tui lakna enkawl kawnga an hmalak dan te, tuihnar an humhalh dan te sawiin, hun lo kal tur atana ruahmanna an siamte a sawi bawk.

He hun hi Hriangtlang Main Reservoir hmunah bul tanin, Jal Bandhan Ceremony hman a ni a. Jal Walk neih chhunzawm niin Community Hall thleng kawng zawh a ni a. Tui inhlan chhawna hi Sr.EE, PHED Er. Isaac Lalchhuanmawia leh VCP Pu Remlalruat ten hming ziakin an nemnghet a ni.

Pu Samuel Lallawmzuala, District Coordinatorin chuan he hun hi kaihhruaiin kalkhawm mipuite lawmna thu leh hun hman a nih chhante a sawi a. Er.Vanlalmuanawma, SDO Serchhip in lawmthu sawiin hun a khar a ni.