4319/2025-2026

Dated Siaha, the 5 February, 2026 : Vawiin chawhnu dar 1:00PM khan DC Mini Conference Hall, Siahaah Siaha District Level Vibrant Village Programme - II (VVP-II) member-te an thukhawm a, Additional DC Pu Abraham Beirazi Khithie chuan kaihruaiin Siaha District chhunga VVP-II kalpui dan tur relho a ni.

Member Secretary Pu M. Misael, Project Director, DRDO nibawk chuan VVP-II chungchanga hriattur pawimawh hrang hrang inhrilhriatna power point hmangin a nei a, India ramri hrula khaw awmte chawikanna tura ruahmanna niin khaw pilril lutuk nia an inngaihna atanga kawng hrang hranga hmasawnna thlentir a, khaichhuah tum an ni a ti. Sawrkar laipuiin kalpui tura duhdan a zamte a sawifiah bawk a, sawrkar hnathawk te’n an dawhkan atanga hnathawh tur an ruahman ang ni lovin khaw neitu VC leh tlawmngai pawl kalkhawmte ngeiin anmahni khaw mamawh leh tha an tih an thlang anga, chumi chu district level-ah pawmpui turin an thlen anga, anni in an ennawn hnuah thehluh tur a ni ang.

Pu M. Misael, Member Secretary leh Project Director, DRDO nibawk chuan Siaha district chhungah khaw 16 thlanchhuah niin khaw pakhat tan kum khatah nuai 300 ruahman a nih thu a sawi a, line department-a thawktute chu he’ng khaw 16-ah hian VVP-II nihphung hrilhfiahna nei pahin khawtlang mipui an inhmuhkhawmpui anga, an khawtlang tana hnathawh tur tha ber nia an hriat an thlanchhuahte chu February 16, 2026 hmain district level committee-ah an thehlut ang a, February 18, 2026-ah endikna neiin thutkhawm leh tur a ni.

Pu S. Lalremthanga, Deputy CEM, MADC chuan sawrkar laipuiin ruahmanna tha tak a siam chu a lawmthu sawiin, khawtlang hruaitute leh official te pawh an kutah tihtheihna a awm laia ruahmanna tha tak siam theihna hun tha an tawng chu vannei a tih thu sawiin; mahni veng leh khua hmangaihna tak tak lantirna hun remchang tak anih avangin khawtlang mipuite leh hruaitute pawhin ngaihtuahna fim tak hmang turin a chah bawk.

Vawiin thutkhawmah hian Pu S. Lalremthanga, Deputy CEM, MADC, line department official, Assam rifles, internet service provider aiawh bakah village council hruaitute leh tlawmngai pawl hruaitute an tel a, zawhna leh chhanna bakah sawihona hun hman a ni. Chairman Pu Abraham Beirazi Khithie chuan lawmthu sawina a nei a, hun hman tihtawp a ni.