1017/2023-2024

Mamit 5th July, 2023 : Pu V.L. Remliana, District Bawrhsap, Mamit District-in thuchhuah a siam angin, Manipur State-a chi leh chi inkara buaina awm avanga sa himna zawnga Mizorama rawn tlan lutte hi Sawrkar chuan chenna tur leh ei leh in turte an tlakchham loh nan theihtawp a chhuah a. Chutih laiin Relief Camp-a chengte leh in luah leh chhungte ina chengte awm dan tur mumal zawk a awm theih nan inkaihhruaina (SOP) siam a ni a, Mamit District chhunga Manipur State a chi leh chi inkara buaina awm avanga sahimna zawnga rawn tlanlut zawng zawng te'n zawm ngei tur a ni tih kan inhriattir e.

1. Relief Camp a awm te tan :-

i) Relief Camp hi mahni duh thu thua chhuahsan loh tur a ni a, Relief Camp enkawltute hnenah hmun danga an kal dawnin phalna lain an chhuak thei chauh ang. Inhlawha kal chhuak Camp-a let leh turte pawh ni se Register-ah an kal ni, thla leh kum leh hmun danga an kalna an ziak thlap ang.

ii) Camp chhuahsan hlen tur-te pawh Register-ah ziah thlap tur a ni ang a, hmun danga an insawnna tur te ziah luh thlap tur a ni ang, an insawnna tur District thuneitute hrilh hriain an hming list nen an thawn tur a ni. Tin, anmahni pawh hi an insawnna veng/khua VC/YMA te hnenah in-report tura hriattir ngei ngei tur a ni.

iii) Relief Camp-a awmte hi ruihlo chi hrang hrangah an inhnamhnawih tur a ni lova, an inhnamhnawih tih hriat a nih chuan dan angin thuneihtute'n hma an la nghal ang.

2. In luah/chhungte hnena awm-te tan:

i) Mi in luah leh chhungte ina khawsate hi mahni duh thu thu-a an awmna an insawn a remchang lova, an insawn dawn chuan an khua/veng VC/YMA te hnenah an in-report tur a ni a. VC/YMA-te'n hetianga insawn te hi District thuneitute hnenah an report tur a ni. An insawnna tur khua/veng VC/YMA-te hnenah pawh an va in-report leh thlap ang a, VC/YMA-te hian District thuneitute hnenah hmun dang atanga rawn insawn te hi an report leh thlap tur a ni.

ii) Mi in luah leh chhungte in-a awmte hi ram danin a phal loh chi hrang hrangah an inhnamhnawih tur a ni lova, hetiang ti hriat an nih chuan thuneitute'n a rang lamin dan angin hma an la nghal ang.