1048/2023-2024

Dated Aizawl the 5th July 2023: Vawiin chawhnu khan Home Minister, Disaster Management and Rehabilitation changtu ni bawk Pu Lalchamliana chuan Vaivakawn leimin a tlawh.

Home leh DM&R Minister Pu Lalchamliana hi Vaivakawn Local Council (LC) leh khawtlang hruaitute'n an lo dawngsawng a, leimin avanga harsatna tawk chhungkaw hrang hrangin an harsatna tawh dan Minister hnenah hian an lo thlen a ni. Minister chuan leimin tuar chhungkuate chu a lainat takzet a ni , a ti a. Leimin chungchang ah chuan tun dinhmun ah ruahmanna zawng zawng siam nghal rum rum a remchan loh avangin a kaihhnawih Department hrang hrang te inhmuhkhawmna zirtawpni, 7th July 2023 ah neih a ni dawn a, chutah chuan ruahmanna leh hmalak dan tur felfai zawk rel a ni ang, a ti.

Pu Lalchamliana chuan State Sawrkar in khuarel chhiatna atan pawisa dah lawk nei mahse, leimin chu a awh chin a zau tham em avang leh a nghawng Chhungkaw thahnem tak annih avangin State disaster management mai piah lamah National Disaster Management lama thlen tura ruahman a ni, a ti. Minister hian DM&R atangin a tul anga an hman atan pawisa leh silpaulin Local council kutah a hlan nghal bawk.

Pi K Lalrinzuali, DM&R Secretary pawh in leimin chungchang a an hmalakna ah Local Council leh khawtlang mipuite inpekna chu lawmawm a tih thu sawiin leimin tuarte hnenah chuan tun dinhmun ah Disaster Management guidelines anga relief pawisa hi pek a ngaih avangin beitham rih hle mahse chhawmdawlna kawngah leh leimin zel tur venna kawngah sawrkar in a tul anga hma a lak chhoh zel tur thu a sawi.

Minister hi Aizawl Dr. Lalhriatzuali Ralte pawh in tawiawm in State Disaster Response Fund hnuai a Gratuitous Relief Chhungkaw 5 hnenah a hlan bawk.

Vaivakawn Local Council Chairman Zothanmawia'n Sawrkar atanga an mamawh te sawiin report a pe nghal a, leimin in a kaihhnawih electric leh PHE tui pipe keh avanga harsatna an tawh te a sawi lang bawk. Local council members te atanga thu dawn dan in leimin avang hian chhungkaw 16 in an chenna an chhuahsan a , in 1 thiah niin,in 5 luah ngam loh in a awm mek a ni.

Minister hi DM&R Secretary, Aizawl DC, PWD ,DM&R leh a kaihhnawih Department Officer leh Staff te , geology lama mi thiam te leh vengchhung Local Council members leh MUP ten an tawiawm a ni.