1049/2023-2024

Dated Serchhip, the 5^th July, 2023: Vawiin khan kan hmaa General Election lo awm tur inbuatsaihna kal zelah Serchhip District Election Office EVM/VVPAT Warehouse Quarterly Inspection atana Warehouse hawnna neih a ni a, chawhnu lamah EVM Demonstration Centre hawnna Pi Nazuk Kumar, District Election Officer leh bawrhsap ni bawk chuan a nei.

Election Commission of India in ruahmanna a siam angin tukin khan inthlanna khawl Electronic Voting Machine (EVM) leh Voter Verifiable Paper Audit Trial (VVPAT) te dahna in chu endikna kalpui tura hawn a ni a. He hunah hian Political Party tin aiawhte leh media mite an tel a, training nana hman tur khawl thenkhat lak hran nghal an ni.

Tlai lamah DC office Complex a building pakhat, Electronic Voting Machine (EVM) hman chhin theih tura phochhuahna hmun atana buatsaih thar EVM Demonstration Centre leh phurh kual theih inthlanna khawl dahna Mobile Demonstration Van chu Pi Nazuk Kumar, District Election Officer chuan a hawng leh bawk.

Pi Nazuk Kumar chuan, ka hmaa inthlanpui lo thleng tur chu fel fai taka kalpui a nih theih nan inbuatsaihna neih chhoh mek niin vawiina kan thiltih hi a bultanna an ni a. Election Commission of India in inbuatsaihna kalpui dan tur a duan mil zela engkim tha taka a kal theih nan District Election Office chu a inbuatsaih zel a, vawiina kan hawn Demonstration Centre ah hian a duh apiangten vote a thlak chhin theih a, zawhfiah duh nei tan pawh zawhfiah theih a ni, a ti.

Hetiang chiah hi N. Vanlaiphaiah leh Thenzawlah pawh siam a ni ang. Chutiang bawkin Mobile Demonstration Van hi inthlan hmain district chhunga Polling Station zawng zawng fan chhuahpui hman tur a ni.