1050/2023-2024

Aizawl the 5th July 2023 : Vawiin khan Vice-Chairmanz HRD Board leh Lengteng bialtu MLA ni bawk Dr. L.Thangmawia chuan JJM scheme hnuaia cheng nuai 1074.90 senna tur, Ngopa Solar Water Pump hnathawh mek a hmunah a tlawh a, MLA hi PHE Sr. SDO Er. L. Zatluanga'n lo dawngsawngin hnathawh ngai zaa 95% zawh a nih tawh thu leh tluang taka hnathawh chhunzawm theih a nih chuan July thlaah zawh hman an in beisei thu a lo hrilh a ni. 

Dr. Thangmawia chuan nizung chakna hmanga Ngopa tui lakna tur hnathawh chak taka kalpui a ni chu lawmawm a tih thu a sawi a. Ngopa hian nakkum 2024 March thlaa KTP General Conference a thlen dawn avanga a bik taka hmanhmawh sak tura a ngenna ngai pawimawh a PHE Department-in chak taka hna an thawh avangin Department chungah lawmthu a sawi bawk. Hnathawktute chu rotling leh rintlaka hna thawk chhunzawm zel turin a chah nghal bawk.