No.3424/2021-2022

Aizawl 16th December, 2021 : Vawiin khan DC Conference Hall, Mamit-ah Mizoram Youth Commission leh DC, Mamit-in an buatsaih Implementation of Livelihood Generation For Returned Migrant Workers due to Covid - 19 te tana buatsaih Cement Mistiri leh Vawkvulh tana training kharna hun hman chu Dr. Lalrozama, IAS, District Bawrhsap chuan a hmanpui.

District Bawrhsap chuan hlawhtling taka training neih a nih theihna tura Core Committee leh a buaipuitu zawng zawngte chungah lawmthu a sawi a, eizawnna tling nei tura mi heti zat training chhuak an awm chu thil lawmawm tak a nih thu sawiin mizo thalaite zingah tihtakzet leh taimakna nen eizawnna kawng zawh tura tan kan lak thar chu thil tul tak a ni a ti. Training chhuak tate duhsakna hlanin an thiamna hlawhtlinpui tura vil zui kawngah Department-te pawh kan inhawn reng a tul thu a sawi bawk.

Hripui leng avanga ram pawna hnathawka awm, Mizorama rawn lette tan Sawrkarin eizawnna ngialnghet an neih theihna atan training hi buatsaih a ni a, Cement Mistiri training-ah hian Seat 40 awmah mi 38 te chuan hlawhtling takin training hi an nei a, Ni 45 (2 Nov atanga 16 Dec) chhung training hi neih a ni. Training chhung hian a thu-a an zir bakah a practical-in training hi neih thin a ni a, Team hrang hrangah inthen-in hemi atan hian Material set panga (5) lei a ni. Vawkvulh training hi November Ni 2 atanga November Ni16 chhung neih niin Seat 20 awmah mi 20 te'n hlawhtling takin training hi an nei bawk a ni.

Vawiin-a Training chhuak tate hi District Bawrhsap chuan Certificate a hlan nghal a, Cement Mistiri te hian Certificate bakah an hnathawhna tur hmanrua an dawng tel nghal a.Vawkvulh Training te hi hun remchangah vawk note pek an ni dawn bawk a ni.

He hun hi Pu Lalfakzuala, Addl.DC, Mamit chuan kaihruaiin Pu F. Vanlalruata, District AH & Veterinary Officer leh Pu B. Lalpuia, Head Faculty DPRC, SIRD te'n report an pe a. Training chhuak tate atangin thusawi ngaihthlak a ni bawk.