No.571/2021-2022

Aizawl, 19^th May 2021: Rural Development Minister Pu Lalruatkima chuan COVID-19 hripuilengin Mizoram min tihbuai mek karah mipuite, a bik takin thingtlang lam ami ten harsatna an tawhte chhawk zangkhai a nih theih nan Rural Development department-in theihtawpin hma an la tih sawiin, kum 2021-22 chhung a MGNREGS hnuaia inhlawhna tura Ministry of Rural Development, Govt. Of India-in thlakalta a Rs. 7788.34 lakh lai a rawn sanction chu beneficiary ten an chhawr tangkai theih nan chak taka an bawhzui thu leh April thla chhunga ni 100 inhlawhna sum Rs. Nuai 4600 chu nimin atang khan beneficiary-te account ah thunluh anih thu sawi.

MGNREGS April, 2021 hnathawhna sum job card holder te account a beisei aia a lut har chu pawi a tihthu sawiin RD Minister chuan SC leh ST Category te inhlawhna tur sum hi April ni 30, 2021 a sanction an nih thu leh Others Category pual hi April ni 26, 2021 a sanction a ni thung tih a sawi a. Others (General) Category hnuaia inhlawhte tana an inhlawhna pawisa chu Job Card Holder te account ah a luhtawh laiin, ST leh SC Category hnuaia inhlawhna pawisa te chu Rural Development Ministry leh Bank lam inkarah technical lama buaina/harsatna a awm avang leh Central Ministry lamah COVID-19 hripuileng avanga Office kal a mumal theih loh avangin Job Card Holder te Account ah lut thei lawk lo a ni, a ti a. He buaina chingfel tur hian a tul anga hma an lak char char thu sawiin, May ni 18, 2021 (Thawhlehni) nimin khan ST leh SC Category te hlawh hi State Nodal Account ah a lut thei ta a, pawia a luh veleh hmalak nghal char char niin vawiin emaw naktukah emaw chuan Job Card holder te account ah an inhlawhna pawisa hi lut kim hman vek tura beisei a ni, a ti a. Inhlawhna pawisa tlema a khawtlai hret chungchangah Job Card Holder hriatthiamna Minister hian a ngen a ni.

Minister chuan Kum 2021-2022 atang hian Rural Development Ministry, Govt. of India chuan MGNREGS hnuaia Mizorama mipui inhlawhte chu Category pathum(3)-Scheduled Tribe (ST), Scheduled Caste (SC) leh Others (General) ah a rawn then hrang tih sawiin, ST Category ah job card holder 205714, SC-ah 37 leh Others (General) ah 1544, an zavaiin job card holder 207295 an awm thu a sawi. Minister chuan heng Category 3 te tan hian Bank Account hran theuh hawng turin State Sawrkar te chu thu min pe a, he thupek ang hian Mizoramah pawh heng Category te tan hian a hrang theuhin Bank Account te chu hawn an ni a. Public Financial Management System ah pawh siamfel a nitawh a, Category hrang hrang hnuaia Job Card holder te tan hian kumina inhlawhna tur Mother Sanction pawh – Scheduled Tribe (ST) tan– Rs. 77,07,47,000/-, Scheduled Caste (SC) tan– Rs. 1,48,000/- leh Others (General) tan– Rs. 79,38,000/- a ni, a ti.

Rural Development Minister chuan sawi chhunzawmin kumin atang hian Job Card Holder pakhatin nikhatah Rs 233/- zel an hlawh tawh dawn a, kum kalta 2020-21 chhunga inhlawhna Rs 225/- aiin Rs 8 in a tam zawk nghe nghe a ni, a ti a. Mizoram chhunga District hrang hrangte kumin April, May leh June thla chhunga an inhlawh dan tura ruahmanna siamdan tlangpui (projected persondays) chu a hnuaia tarlan ang hi a nih thu a sawi bawk.

Minister chuan Mizoram pumah chawhruala lakin April thlaah ni 11,  May thlaah ni 12 leh June thlaah ni10 inhlawh turin ruahmanna siam a ni, a ti. 

Pu Ruatkima chuan MGNREGS hnuaiah hian tuihna tipung tam thei tura kum 2019 atanga “Jal Shakti Abhiyan - Catch the Rain Campaign” kalpui a nih atang khan khaw thenkhatah tuikhur hnar a contour trench kan siam chuan tuihna a ti tam zual a, a bik takin Tuipang RD Block hnuaiah kan hlawhtling hle a ni, a ti. Jal Shakti Abhiyan hi Mizoram khawtinah kalpui tum a ni a. He Campaign hnuaiah hian tuihna tipung thei tur leh Ruahtui tla luangral mai lo a lo dawng khawlna tur Tuizem, Farm Pond leh Dug-Out Pond te siam tum a ni, a ti bawk. Tin,Bawlhhlawh sawngbawlna tur Compost Pit leh Soak Pit te chu Job Card Holder chhungkuate siamtir tum a ni a ti bawk. Minister chuan hemi piah lamah hian ei leh bar a hma kan sawn nan leh kan thlaitharte a lo punna turin hmun hrang hrangah a theih ang angin hmalak mek a nih thu a sawi tel bawk a ni.